២៥. អញ្ញតិត្ថិយបុព្ពកថា

៨៦. តេន ខោ បន សមយេន យោ សោ អញ្ញតិត្ថិយបុព្ពោ [យោ សោ បសុរបរិព្ពាជកោ អញ្ញតិត្ថិយបុព្ពោ (ក.)] បជ្ឈាយេន សហធម្មិកំ វុច្ចមានោ ឧបជ្ឈាយស្ស វាទំ អារោបេត្វា តំយេវ តិត្ថាយតនំ សង្កមិ. សោ បុន បច្ចាគន្ត្វា ភិក្ខូ ឧបសម្បទំ យាចិ. ភិក្ខូ ភគវតោ ឯតមត្ថំ អារោចេសុំ. យោ សោ, ភិក្ខវេ, អញ្ញតិត្ថិយបុព្ពោ ឧបជ្ឈាយេន សហធម្មិកំ វុច្ចមានោ ឧបជ្ឈាយស្ស វាទំ អារោបេត្វា តំយេវ តិត្ថាយតនំ សង្កន្តោ, សោ អាគតោ ន ឧបសម្បាទេតព្ពោ. យោ សោ, ភិក្ខវេ, អញ្ញោបិ អញ្ញតិត្ថិយបុព្ពោ ឥមស្មិំ ធម្មវិនយេ អាកង្ខតិ បព្ពជ្ជំ, អាកង្ខតិ ឧបសម្បទំ, តស្ស ចត្តារោ មាសេ បរិវាសោ ទាតព្ពោ. ឯវញ្ច បន, ភិក្ខវេ, ទាតព្ពោ – បឋមំ កេសមស្សុំ ឱហារាបេត្វា កាសាយានិ វត្ថានិ អច្ឆាទាបេត្វា ឯកំសំ ឧត្តរាសង្គំ ការាបេត្វា ភិក្ខូនំ បាទេ វន្ទាបេត្វា ឧក្កុដិកំ និសីទាបេត្វា អញ្ជលិំ បគ្គណ្ហាបេត្វា ឯវំ វទេហីតិ វត្តព្ពោ – ‘‘ពុទ្ធំ សរណំ គច្ឆាមិ, ធម្មំ សរណំ គច្ឆាមិ, សង្ឃំ សរណំ គច្ឆាមិ; ទុតិយម្បិ ពុទ្ធំ សរណំ គច្ឆាមិ, ទុតិយម្បិ ធម្មំ សរណំ គច្ឆាមិ, ទុតិយម្បិ សង្ឃំ សរណំ គច្ឆាមិ; តតិយម្បិ ពុទ្ធំ សរណំ គច្ឆាមិ, តតិយម្បិ ធម្មំ សរណំ គច្ឆាមិ, តតិយម្បិ សង្ឃំ សរណំ គច្ឆាមី’’តិ.

តេន, ភិក្ខវេ, អញ្ញតិត្ថិយបុព្ពេន សង្ឃំ ឧបសង្កមិត្វា ឯកំសំ ឧត្តរាសង្គំ ករិត្វា ភិក្ខូនំ បាទេ វន្ទិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, ភន្តេ, អញ្ញតិត្ថិយបុព្ពោ ឥមស្មិំ ធម្មវិនយេ អាកង្ខាមិ ឧបសម្បទំ. សោហំ, ភន្តេ, សង្ឃំ ចត្តារោ មាសេ បរិវាសំ យាចាមី’’តិ. ទុតិយម្បិ យាចិតព្ពោ. តតិយម្បិ យាចិតព្ពោ. ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ. អយំ ឥត្ថន្នាមោ អញ្ញតិត្ថិយបុព្ពោ ឥមស្មិំ ធម្មវិនយេ អាកង្ខតិ ឧបសម្បទំ. សោ សង្ឃំ ចត្តារោ មាសេ បរិវាសំ យាចតិ. យទិ សង្ឃស្ស បត្តកល្លំ សង្ឃោ ឥត្ថន្នាមស្ស អញ្ញតិត្ថិយបុព្ពស្ស ចត្តារោ មាសេ បរិវាសំ ទទេយ្យ. ឯសា ញត្តិ.

‘‘សុណាតុ មេ, ភន្តេ, សង្ឃោ. អយំ ឥត្ថន្នាមោ អញ្ញតិត្ថិយបុព្ពោ ឥមស្មិំ ធម្មវិនយេ អាកង្ខតិ ឧបសម្បទំ. សោ សង្ឃំ ចត្តារោ មាសេ បរិវាសំ យាចតិ. សង្ឃោ ឥត្ថន្នាមស្ស អញ្ញតិត្ថិយបុព្ពស្ស ចត្តារោ មាសេ បរិវាសំ ទេតិ. យស្សាយស្មតោ ខមតិ ឥត្ថន្នាមស្ស អញ្ញតិត្ថិយបុព្ពស្ស ចត្តារោ មាសេ បរិវាសស្ស ទានំ, សោ តុណ្ហស្ស; យស្ស នក្ខមតិ, សោ ភាសេយ្យ.

‘‘ទិន្នោ សង្ឃេន ឥត្ថន្នាមស្ស អញ្ញតិត្ថិយបុព្ពស្ស ចត្តារោ មាសេ បរិវាសោ. ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ.

៨៧. ‘‘ឯវំ ខោ, ភិក្ខវេ, អញ្ញតិត្ថិយបុព្ពោ អារាធកោ ហោតិ, ឯវំ អនារាធកោ. កថញ្ច, ភិក្ខវេ, អញ្ញតិត្ថិយបុព្ពោ អនារាធកោ ហោតិ? ឥធ, ភិក្ខវេ, អញ្ញតិត្ថិយបុព្ពោ អតិកាលេន គាមំ បវិសតិ, អតិទិវា បដិក្កមតិ. ឯវម្បិ, ភិក្ខវេ, អញ្ញតិត្ថិយបុព្ពោ អនារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ វេសិយាគោចរោ វា ហោតិ, វិធវាគោចរោ វា ហោតិ, ថុល្លកុមារិកាគោចរោ វា ហោតិ, បណ្ឌកគោចរោ វា ហោតិ, ភិក្ខុនិគោចរោ វា ហោតិ. ឯវម្បិ, ភិក្ខវេ, អញ្ញតិត្ថិយបុព្ពោ អនារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ យានិ តានិ សព្រហ្មចារីនំ ឧច្ចាវចានិ ករណីយានិ, តត្ថ ន ទក្ខោ ហោតិ, ន អនលសោ, ន តត្រុបាយាយ វីមំសាយ សមន្នាគតោ, ន អលំ កាតុំ, ន អលំ សំវិធាតុំ. ឯវម្បិ, ភិក្ខវេ, អញ្ញតិត្ថិយបុព្ពោ អនារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ ន តិព្ពច្ឆន្ទោ ហោតិ ឧទ្ទេសេ, បរិបុច្ឆាយ, អធិសីលេ, អធិចិត្តេ, អធិបញ្ញាយ. ឯវម្បិ, ភិក្ខវេ, អញ្ញតិត្ថិយបុព្ពោ អនារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ យស្ស តិត្ថាយតនា សង្កន្តោ ហោតិ, តស្ស សត្ថុនោ តស្ស ទិដ្ឋិយា តស្ស ខន្តិយា តស្ស រុចិយា តស្ស អាទាយស្ស អវណ្ណេ ភញ្ញមានេ កុបិតោ ហោតិ អនត្តមនោ អនភិរទ្ធោ, ពុទ្ធស្ស វា ធម្មស្ស វា សង្ឃស្ស វា អវណ្ណេ ភញ្ញមានេ អត្តមនោ ហោតិ ឧទគ្គោ អភិរទ្ធោ. យស្ស វា បន តិត្ថាយតនា សង្កន្តោ ហោតិ, តស្ស សត្ថុនោ តស្ស ទិដ្ឋិយា តស្ស ខន្តិយា តស្ស រុចិយា តស្ស អាទាយស្ស វណ្ណេ ភញ្ញមានេ អត្តមនោ ហោតិ ឧទគ្គោ អភិរទ្ធោ, ពុទ្ធស្ស វា ធម្មស្ស វា សង្ឃស្ស វា វណ្ណេ ភញ្ញមានេ កុបិតោ ហោតិ អនត្តមនោ អនភិរទ្ធោ. ឥទំ, ភិក្ខវេ, សង្ឃាតនិកំ អញ្ញតិត្ថិយបុព្ពស្ស អនារាធនីយស្មិំ. ឯវម្បិ ខោ, ភិក្ខវេ, អញ្ញតិត្ថិយបុព្ពោ អនារាធកោ ហោតិ. ឯវំ អនារាធកោ ខោ, ភិក្ខវេ, អញ្ញតិត្ថិយបុព្ពោ អាគតោ ន ឧបសម្បាទេតព្ពោ.

‘‘កថញ្ច, ភិក្ខវេ, អញ្ញតិត្ថិយបុព្ពោ អារាធកោ ហោតិ? ឥធ, ភិក្ខវេ, អញ្ញតិត្ថិយបុព្ពោ នាតិកាលេន គាមំ បវិសតិ នាតិទិវា បដិក្កមតិ. ឯវម្បិ, ភិក្ខវេ, អញ្ញតិត្ថិយបុព្ពោ អារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ ន វេសិយាគោចរោ ហោតិ, ន វិធវាគោចរោ ហោតិ, ន ថុល្លកុមារិកាគោចរោ ហោតិ, ន បណ្ឌកគោចរោ ហោតិ, ន ភិក្ខុនិគោចរោ ហោតិ. ឯវម្បិ, ភិក្ខវេ, អញ្ញតិត្ថិយបុព្ពោ អារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ យានិ តានិ សព្រហ្មចារីនំ ឧច្ចាវចានិ ករណីយានិ, តត្ថ ទក្ខោ ហោតិ, អនលសោ, តត្រុបាយាយ វីមំសាយ សមន្នាគតោ, អលំ កាតុំ, អលំ សំវិធាតុំ. ឯវម្បិ, ភិក្ខវេ, អញ្ញតិត្ថិយបុព្ពោ អារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ តិព្ពច្ឆន្ទោ ហោតិ ឧទ្ទេសេ, បរិបុច្ឆាយ, អធិសីលេ, អធិចិត្តេ, អធិបញ្ញាយ. ឯវម្បិ, ភិក្ខវេ, អញ្ញតិត្ថិយបុព្ពោ អារាធកោ ហោតិ.

‘‘បុន ចបរំ, ភិក្ខវេ, អញ្ញតិត្ថិយបុព្ពោ យស្ស តិត្ថាយតនា សង្កន្តោ ហោតិ, តស្ស សត្ថុនោ តស្ស ទិដ្ឋិយា តស្ស ខន្តិយា តស្ស រុចិយា តស្ស អាទាយស្ស អវណ្ណេ ភញ្ញមានេ អត្តមនោ ហោតិ ឧទគ្គោ អភិរទ្ធោ, ពុទ្ធស្ស វា ធម្មស្ស វា សង្ឃស្ស វា អវណ្ណេ ភញ្ញមានេ កុបិតោ ហោតិ អនត្តមនោ អនភិរទ្ធោ. យស្ស វា បន តិត្ថាយតនា សង្កន្តោ ហោតិ, តស្ស សត្ថុនោ តស្ស ទិដ្ឋិយា តស្ស ខន្តិយា តស្ស រុចិយា តស្ស អាទាយស្ស វណ្ណេ ភញ្ញមានេ កុបិតោ ហោតិ អនត្តមនោ អនភិរទ្ធោ, ពុទ្ធស្ស វា ធម្មស្ស វា សង្ឃស្ស វា វណ្ណេ ភញ្ញមានេ អត្តមនោ ហោតិ ឧទគ្គោ អភិរទ្ធោ. ឥទំ, ភិក្ខវេ, សង្ឃាតនិកំ អញ្ញតិត្ថិយបុព្ពស្ស អារាធនីយស្មិំ. ឯវម្បិ ខោ, ភិក្ខវេ, អញ្ញតិត្ថិយបុព្ពោ អារាធកោ ហោតិ. ឯវំ អារាធកោ ខោ, ភិក្ខវេ, អញ្ញតិត្ថិយបុព្ពោ អាគតោ ឧបសម្បាទេតព្ពោ.

‘‘សចេ, ភិក្ខវេ, អញ្ញតិត្ថិយបុព្ពោ នគ្គោ អាគច្ឆតិ, ឧបជ្ឈាយមូលកំ ចីវរំ បរិយេសិតព្ពំ. សចេ អច្ឆិន្នកេសោ អាគច្ឆតិ, សង្ឃោ អបលោកេតព្ពោ ភណ្ឌុកម្មាយ. យេ តេ, ភិក្ខវេ, អគ្គិកា ជដិលកា, តេ អាគតា ឧបសម្បាទេតព្ពា, ន តេសំ បរិវាសោ ទាតព្ពោ. តំ កិស្ស ហេតុ? កម្មវាទិនោ ឯតេ, ភិក្ខវេ, កិរិយវាទិនោ. សចេ, ភិក្ខវេ, ជាតិយា សាកិយោ អញ្ញតិត្ថិយបុព្ពោ អាគច្ឆតិ, សោ អាគតោ ឧបសម្បាទេតព្ពោ, ន តស្ស បរិវាសោ ទាតព្ពោ. ឥមាហំ, ភិក្ខវេ, ញាតីនំ អាវេណិកំ បរិហារំ ទម្មី’’តិ.

អញ្ញតិត្ថិយបុព្ពកថា និដ្ឋិតា.

សត្តមភាណវារោ.