៤. ឱក្កន្តសំយុត្តំ

១-១០. ចក្ខុសុត្តាទិវណ្ណនា

៣០២-៣១១. សទ្ធាធិមោក្ខន្តិ សទ្ទហនវសេន បវត្តំ អធិមោក្ខំ, ន សន្និដ្ឋានមត្តវសេន បវត្តំ អធិមោក្ខំ. ទស្សនម្បិ សម្មត្តំ, តំសិជ្ឈានវសេន បវត្តនិយាមោ សម្មត្តនិយាមោ, អរិយមគ្គោ. អនន្តរាយតំ ទីបេតិ កប្បវិនាសបដិភាគេន បវត្តត្តា. តថា ចាហ ‘‘តេនេវាហា’’តិអាទិ. កប្បសីសេន ភាជនលោកំ វទតិ. សោ ហិ ឧឌ្ឌយ្ហតិ, ន កប្បោ, ឧឌ្ឌយ្ហនវេលាតិ ឈាយនវេលា. ឋិតោ កប្បោ ឋិតកប្បោ, សោ អស្ស អត្ថីតិ ឋិតកប្បី, កប្បំ ឋបេតុំ សមត្ថោតិ អត្ថោ. ឱលោកនន្តិ សច្ចាភិសមយសង្ខាតំ ទស្សនំ. ខមន្តិ សហន្តិ, ញាយន្តីតិ អត្ថោ.

ចក្ខុសុត្តាទិវណ្ណនា និដ្ឋិតា.

ឱក្កន្តសំយុត្តវណ្ណនា និដ្ឋិតា.