១. បឋមវគ្គោ

១. មារសុត្តវណ្ណនា

១៦០. មារសទ្ទោយំ ភាវសាធនោតិ ទស្សេន្តោ ‘‘មារោ វា អស្សាតិ មរណំ វា ភវេយ្យា’’តិ អាហ. មារេតាតិ មរិតព្ពោ មារំ មរណំ ឯតព្ពោតិ អាហ ‘‘មារេតព្ពោ’’តិ. អនុបាទានិព្ពានត្ថាតិ ផលវិមុត្តិសង្ខាតា អរហតោ អរហន្តតា នាម យាវទេវ អនុបាទានិព្ពានត្ថា. និព្ពានព្ភន្តរេតិ អនុបាទានិព្ពានាធិគមស្ស អព្ភន្តរេ តតោ ឱរមេវ ឥទំ មគ្គំ ព្រហ្មចរិយំ វុស្សតិ, ន តតោ បរំ. អស្សាតិ ព្រហ្មចរិយស្ស.

មារសុត្តវណ្ណនា និដ្ឋិតា.

២-១០. សត្តសុត្តាទិវណ្ណនា

១៦១-១៦៩. លគ្គបុច្ឆាតិ លគ្គនស្ស ពជ្ឈនស្ស បុច្ឆា. យទិ រូបាទីសុ សត្តត្តា សត្តោ, ខីណាសវា កថំ សត្តាតិ? សត្តភូតបុព្ពាតិ កត្វា. កីឡាវិគមន្តិ កីឡាយ អបនយនំ ឱរមណំ. យន្តរជ្ជុ វិយ ភវបពន្ធស្ស នយនតោ ភវរជ្ជូតិ តណ្ហា វុត្តា.

សត្តសុត្តាទិវណ្ណនា និដ្ឋិតា.

បឋមវគ្គវណ្ណនា និដ្ឋិតា.