១. បត្តសន្និចយសិក្ខាបទវណ្ណនា

និស្សគ្គិយេសុ អាទិវគ្គស្ស តាវ បឋមេ បត្តសន្និចយំ ករេយ្យាតិ បត្តសន្និធិំ ករេយ្យ, ឯកាហំ អនធិដ្ឋហិត្វា វា អវិកប្បេត្វា វា អធិដ្ឋានុបគំ បត្តំ ឋបេយ្យាតិ អត្ថោ.

សាវត្ថិយំ ឆព្ពគ្គិយា ភិក្ខុនិយោ អារព្ភ បត្តសន្និចយវត្ថុស្មិំ បញ្ញត្តំ, សេសកថាមគ្គោ ភិក្ខុបាតិមោក្ខវណ្ណនាយំ វុត្តនយេនេវ វេទិតព្ពោ, តត្រ ហិ ទសាហាតិក្កមេ អាបត្តិ, ឥធ ឯកាហាតិក្កមេតិ ឯត្តកមេវ តស្ស ច ឥមស្ស ច នានាករណំ, សេសំ តាទិសមេវាតិ.

បត្តសន្និចយសិក្ខាបទវណ្ណនា និដ្ឋិតា.