៥. បញ្ចកនិទ្ទេសវណ្ណនា

៨០៤. តមេវ បញ្ញំ ‘‘ទ្វីសុ ឈានេសុ បញ្ញា បីតិផរណេនា’’តិអាទិនា វិភជតិ. អភិសន្ទនបរិសន្ទនបរិបូរណានិបិ បរិប្ផរណំ វិយ ផរណាបីតិយា, តំសហគតសុខស្ស ច កិច្ចវិសេសភូតានិ អធិប្បេតានីតិ អាហ ‘‘អភិសន្ទេតីតិ…បេ… វេទិតព្ព’’ន្តិ. អាទិនា នយេនាតិ ‘‘អភិសន្ទេតី’’តិអាទិនា (ទី. និ. ១.២២៦; ម. និ. ១.៤២៧) សុត្តេ អាគតនយេន. ផរណញ្ចេត្ថ បីតិសុខសមុដ្ឋិតបណីតរូបេហិ កាយស្ស អភិព្យាបនំ ទដ្ឋព្ពំ. អារម្មណេតិ បីតិផរណតាសុខផរណតាសីសេន វុត្តានំ តិកទុកឈានានំ អារម្មណេ. តាតិ បីតិផរណតាសុខផរណតា.

សមាធិមុខេនាតិ សមាធិំ មុខំ បមុខំ កត្វា, សមាធិសីសេនាតិ អត្ថោ, សមាធិបមុខេន វា ឧទ្ទេសនិទ្ទេសេន. អញ្ញេ កិលេសា ទិដ្ឋិមានាទយោ. អប្បយោគេនាតិ ឈានវិមោក្ខាទីនំ វិយ ឧប្បាទនីយបរិកម្មបយោគេន វិនា. អាវជ្ជនាសទិសោ ហិ ផលសមាបត្តិអត្ថោ សម្មសនចារោ. ឋបិតត្តាតិ បវត្តិតត្តា. សតិពហុលតាយាតិ សតិយា អភិណ្ហុប្បត្តិយា. បរិច្ឆិន្ទនសតិយា កាលស្ស សតោតិ ទស្សេតីតិ យោជនា.

បញ្ចកនិទ្ទេសវណ្ណនា និដ្ឋិតា.