៣. បញ្ហបុច្ឆកវណ្ណនា

៦៤០. តីសូតិ បឋមាទីសុ តីសុ. ចតុក្កនយេន ហិ តំ វុត្តំ. ឯវំកោដ្ឋាសិកាតិ អប្បមាណាតិ វុត្តា. តេនាហ ‘‘លោកុត្តរភូតា ឯវាតិ អធិប្បាយោ’’តិ. បរិច្ឆិន្នាកាស…បេ… ចតុត្ថានំ វដ្ដវិបស្សនាបាទកត្តា ‘‘សព្ពត្ថបាទកចតុត្ថេ សង្គហិតានី’’តិ វុត្តំ.

អយំ កថាតិ បរិត្តារម្មណាទិកថា. ហេដ្ឋិមោ អរិយោ ឧបរិមស្ស អរិយស្ស លោកុត្តរចិត្តានិ បដិវិជ្ឈិតុំ ន សក្កោតីតិ វុត្តំ ‘‘ន ច…បេ… សក្កោតី’’តិ.

‘‘កិរិយតោ ទ្វាទសន្ន’’ន្តិ ច បាឋោ អត្ថិ. សហ វទតិ លោកុត្តរផលចតុត្ថតាសាមញ្ញេនាតិ អធិប្បាយោ. ឥធ សព្ពសទ្ទស្ស បទេសសព្ពវាចិភាវតោ ឯកទេសស្ស អសម្ភវេបិ សព្ពត្ថបាទកតា ឯវ វេទិតព្ពាតិ ទស្សេតុំ ‘‘សព្ពត្ថ…បេ… ទដ្ឋព្ព’’ន្តិ អាហ. បរិច្ឆិន្នាកាសកសិណចតុត្ថាទីនីតិ អាទិ-សទ្ទេន អានាបានចតុត្ថាទយោ សង្គហិតា. នវត្តព្ពតាយាតិ នវត្តព្ពារម្មណតាយ.

និព្ពានញ្ចាតិ វត្តព្ពំ តទារម្មណស្សាបិ ពហិទ្ធារម្មណភាវតោ.

‘‘សសន្តានគតម្បី’’តិ ឥទំ រូប-សទ្ទេន, កម្ម-សទ្ទេន ច សម្ពន្ធិតព្ពំ ‘‘សសន្តានគតម្បិ អបាកដំ រូបំ ទិព្ពចក្ខុ វិយ សសន្តានគតម្បិ អបាកដំ កម្មំ វិភាវេតី’’តិ. បាកដេ បន សសន្តានគតេ រូបេ, កម្មេ ច អភិញ្ញាញាណេន បយោជនំ នត្ថីតិ ‘‘អបាកដ’’ន្តិ វិសេសេត្វា វុត្តំ.

បញ្ហបុច្ឆកវណ្ណនា និដ្ឋិតា.

ឈានវិភង្គវណ្ណនា និដ្ឋិតា.