១២. ឧបាទានបញ្ហាសុត្តំ

៣២៥. ‘‘‘ឧបាទានំ, ឧបាទាន’ន្តិ, អាវុសោ សារិបុត្ត, វុច្ចតិ. កតមំ នុ ខោ, អាវុសោ, ឧបាទាន’’ន្តិ? ‘‘ចត្តារិមានិ, អាវុសោ, ឧបាទានានិ. កាមុបាទានំ, ទិដ្ឋុបាទានំ សីលព្ពតុបាទានំ, អត្តវាទុបាទានំ – ឥមានិ ខោ, អាវុសោ, ចត្តារិ ឧបាទានានី’’តិ. ‘‘អត្ថិ បនាវុសោ, មគ្គោ អត្ថិ បដិបទា, ឯតេសំ ឧបាទានានំ បហានាយា’’តិ? ‘‘អត្ថិ ខោ, អាវុសោ, មគ្គោ អត្ថិ បដិបទា, ឯតេសំ ឧបាទានានំ បហានាយា’’តិ. ‘‘កតមោ បនាវុសោ, មគ្គោ កតមា បដិបទា, ឯតេសំ ឧបាទានានំ បហានាយា’’តិ? ‘‘អយមេវ ខោ, អាវុសោ, អរិយោ អដ្ឋង្គិកោ មគ្គោ, ឯតេសំ ឧបាទានានំ បហានាយ, សេយ្យថិទំ – សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ. អយំ ខោ, អាវុសោ, មគ្គោ អយំ បដិបទា, ឯតេសំ ឧបាទានានំ បហានាយា’’តិ. ‘‘ភទ្ទកោ, អាវុសោ, មគ្គោ ភទ្ទិកា បដិបទា, ឯតេសំ ឧបាទានានំ បហានាយ. អលញ្ច បនាវុសោ សារិបុត្ត, អប្បមាទាយា’’តិ. ទ្វាទសមំ.