១១-២០. អណ្ឌជទានូបការសុត្តទសកំ

៣៥២-៣៦១. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា អណ្ឌជានំ នាគានំ សហព្យតំ ឧបបជ្ជតី’’តិ?

‘‘ឥធ, ភិក្ខុ, ឯកច្ចោ កាយេន ទ្វយការី ហោតិ, វាចាយ ទ្វយការី, មនសា ទ្វយការី. តស្ស សុតំ ហោតិ – ‘អណ្ឌជា នាគា ទីឃាយុកា វណ្ណវន្តោ សុខពហុលា’តិ. តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា អណ្ឌជានំ នាគានំ សហព្យតំ ឧបបជ្ជេយ្យ’ន្តិ. សោ អន្នំ ទេតិ. សោ កាយស្ស ភេទា បរំ មរណា អណ្ឌជានំ នាគានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ…បេ… ឧបបជ្ជតីតិ…បេ… សោ បានំ ទេតិ…បេ… វត្ថំ ទេតិ…បេ… យានំ ទេតិ…បេ… មាលំ ទេតិ…បេ… គន្ធំ ទេតិ…បេ… វិលេបនំ ទេតិ…បេ… សេយ្យំ ទេតិ…បេ… អាវសថំ ទេតិ…បេ… បទីបេយ្យំ ទេតិ. សោ កាយស្ស ភេទា បរំ មរណា អណ្ឌជានំ នាគានំ សហព្យតំ ឧបបជ្ជតិ. អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា អណ្ឌជានំ នាគានំ សហព្យតំ ឧបបជ្ជតី’’តិ. វីសតិមំ.