៣. វិញ្ញាណសុត្តំ

៣២៤. សាវត្ថិនិទានំ. ‘‘យោ, ភិក្ខវេ, ចក្ខុវិញ្ញាណស្មិំ ឆន្ទរាគោ, ចិត្តស្សេសោ ឧបក្កិលេសោ. យោ សោតវិញ្ញាណស្មិំ… យោ ឃានវិញ្ញាណស្មិំ… យោ ជិវ្ហាវិញ្ញាណស្មិំ… យោ កាយវិញ្ញាណស្មិំ… យោ មនោវិញ្ញាណស្មិំ ឆន្ទរាគោ, ចិត្តស្សេសោ ឧបក្កិលេសោ. យតោ ខោ, ភិក្ខវេ, ភិក្ខុនោ ឥមេសុ ឆសុ ឋានេសុ ចេតសោ ឧបក្កិលេសោ បហីនោ ហោតិ, នេក្ខម្មនិន្នញ្ចស្ស ចិត្តំ ហោតិ. នេក្ខម្មបរិភាវិតំ ចិត្តំ កម្មនិយំ ខាយតិ, អភិញ្ញា សច្ឆិករណីយេសុ ធម្មេសូ’’តិ. តតិយំ.