៩. ធាតុសុត្តំ

៣២០. សាវត្ថិនិទានំ. ‘‘យោ ខោ, ភិក្ខវេ, បថវីធាតុយា ឧប្បាទោ ឋិតិ អភិនិព្ពត្តិ បាតុភាវោ…បេ… ជរាមរណស្ស បាតុភាវោ; យោ អាបោធាតុយា… យោ តេជោធាតុយា… យោ វាយោធាតុយា… យោ អាកាសធាតុយា… យោ វិញ្ញាណធាតុយា ឧប្បាទោ ឋិតិ អភិនិព្ពត្តិ បាតុភាវោ, ទុក្ខស្សេសោ ឧប្បាទោ, រោគានំ ឋិតិ, ជរាមរណស្ស បាតុភាវោ. យោ ច ខោ, ភិក្ខវេ, បថវីធាតុយា និរោធោ…បេ… ជរាមរណស្ស អត្ថង្គមោ; យោ អាបោធាតុយា និរោធោ… យោ តេជោធាតុយា និរោធោ… យោ វាយោធាតុយា និរោធោ… យោ អាកាសធាតុយា និរោធោ… យោ វិញ្ញាណធាតុយា និរោធោ វូបសមោ អត្ថង្គមោ, ទុក្ខស្សេសោ និរោធោ, រោគានំ វូបសមោ, ជរាមរណស្ស អត្ថង្គមោ’’តិ. នវមំ.