១០. ខន្ធសុត្តំ

៣១១. សាវត្ថិនិទានំ. ‘‘រូបំ, ភិក្ខវេ, អនិច្ចំ វិបរិណាមិ អញ្ញថាភាវិ; វេទនា អនិច្ចា វិបរិណាមី អញ្ញថាភាវី; សញ្ញា… សង្ខារា អនិច្ចា វិបរិណាមិនោ អញ្ញថាភាវិនោ; វិញ្ញាណំ អនិច្ចំ វិបរិណាមិ អញ្ញថាភាវិ. យោ, ភិក្ខវេ, ឥមេ ធម្មេ ឯវំ សទ្ទហតិ អធិមុច្ចតិ, អយំ វុច្ចតិ សទ្ធានុសារី, ឱក្កន្តោ សម្មត្តនិយាមំ, សប្បុរិសភូមិំ ឱក្កន្តោ, វីតិវត្តោ បុថុជ្ជនភូមិំ; អភព្ពោ តំ កម្មំ កាតុំ, យំ កម្មំ កត្វា និរយំ វា តិរច្ឆានយោនិំ វា បេត្តិវិសយំ វា ឧបបជ្ជេយ្យ; អភព្ពោ ច តាវ កាលំ កាតុំ យាវ ន សោតាបត្តិផលំ សច្ឆិករោតិ’’.

‘‘យស្ស ខោ, ភិក្ខវេ, ឥមេ ធម្មា ឯវំ បញ្ញាយ មត្តសោ និជ្ឈានំ ខមន្តិ, អយំ វុច្ចតិ – ‘ធម្មានុសារី, ឱក្កន្តោ សម្មត្តនិយាមំ, សប្បុរិសភូមិំ ឱក្កន្តោ, វីតិវត្តោ បុថុជ្ជនភូមិំ; អភព្ពោ តំ កម្មំ កាតុំ, យំ កម្មំ កត្វា និរយំ វា តិរច្ឆានយោនិំ វា បេត្តិវិសយំ វា ឧបបជ្ជេយ្យ; អភព្ពោ ច តាវ កាលំ កាតុំ យាវ ន សោតាបត្តិផលំ សច្ឆិករោតិ’. យោ, ភិក្ខវេ, ឥមេ ធម្មេ ឯវំ បជានាតិ ឯវំ បស្សតិ, អយំ វុច្ចតិ – ‘សោតាបន្នោ អវិនិបាតធម្មោ និយតោ សម្ពោធិបរាយនោ’’’តិ. ទសមំ.

ឱក្កន្តសំយុត្តំ [ឱក្កន្តិកសំយុត្តំ (បី. ក.)] សមត្តំ.