១២. និរោធធម្មសុត្តំ

១៩៣. សាវត្ថិនិទានំ. ឯកមន្តំ និសិន្នោ ខោ អាយស្មា រាធោ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ, យមហំ ភគវតោ ធម្មំ សុត្វា ឯកោ វូបកដ្ឋោ អប្បមត្តោ អាតាបី បហិតត្តោ វិហរេយ្យ’’ន្តិ.

‘‘យោ ខោ, រាធ, និរោធធម្មោ; តត្រ តេ ឆន្ទោ បហាតព្ពោ, រាគោ បហាតព្ពោ, ឆន្ទរាគោ បហាតព្ពោ. កោ ច, រាធ, និរោធធម្មោ? រូបំ ខោ, រាធ, និរោធធម្មោ; តត្រ តេ ឆន្ទោ បហាតព្ពោ…បេ… វេទនា និរោធធម្មោ; តត្រ តេ ឆន្ទោ បហាតព្ពោ…បេ… សញ្ញា និរោធធម្មោ; តត្រ តេ ឆន្ទោ បហាតព្ពោ…បេ… សង្ខារា និរោធធម្មោ; តត្រ តេ ឆន្ទោ បហាតព្ពោ…បេ… វិញ្ញាណំ និរោធធម្មោ; តត្រ តេ ឆន្ទោ បហាតព្ពោ…បេ… យោ ខោ, រាធ, និរោធធម្មោ; តត្រ តេ ឆន្ទោ បហាតព្ពោ, រាគោ បហាតព្ពោ, ឆន្ទរាគោ បហាតព្ពោ’’តិ [សីហឡបោត្ថកេ បន ឥមស្មិំ វគ្គេ ឆត្តិំស សុត្តានិ វិភត្តានិ ឯកេកំ សុត្តំ តីណិ តីណិ កត្វា, ឯវំ ចតុត្ថវគ្គេបិ].

អាយាចនវគ្គោ តតិយោ.

តស្សុទ្ទានំ –

មារោ ច មារធម្មោ ច, អនិច្ចេន អបរេ ទុវេ;

ទុក្ខេន ច ទុវេ វុត្តា, អនត្តេន តថេវ ច;

ខយវយសមុទយំ, និរោធធម្មេន ទ្វាទសាតិ.