៨. អនត្តធម្មសុត្តំ

១៧៧. សាវត្ថិនិទានំ. ឯកមន្តំ និសិន្នោ ខោ អាយស្មា រាធោ ភគវន្តំ ឯតទវោច – ‘‘‘អនត្តធម្មោ, អនត្តធម្មោ’តិ, ភន្តេ, វុច្ចតិ. កតមោ នុ ខោ, ភន្តេ, អនត្តធម្មោ’’តិ? ‘‘រូបំ ខោ, រាធ, អនត្តធម្មោ, វេទនា អនត្តធម្មោ, សញ្ញា អនត្តធម្មោ, សង្ខារា អនត្តធម្មោ, វិញ្ញាណំ អនត្តធម្មោ. ឯវំ បស្សំ…បេ… នាបរំ ឥត្ថត្តាយាតិ បជានាតី’’តិ. អដ្ឋមំ.

៩.ខយធម្មសុត្តំ

១៧៨. សាវត្ថិនិទានំ. ឯកមន្តំ និសិន្នោ ខោ អាយស្មា រាធោ ភគវន្តំ ឯតទវោច – ‘‘‘ខយធម្មោ, ខយធម្មោ’តិ, ភន្តេ, វុច្ចតិ. កតមោ នុ ខោ, ភន្តេ, ខយធម្មោ’’តិ? ‘‘រូបំ ខោ, រាធ, ខយធម្មោ, វេទនា ខយធម្មោ, សញ្ញា ខយធម្មោ, សង្ខារា ខយធម្មោ, វិញ្ញាណំ ខយធម្មោ. ឯវំ បស្សំ…បេ… នាបរំ ឥត្ថត្តាយាតិ បជានាតី’’តិ. នវមំ.