៤. សមាធិមូលកកល្លិតសុត្តំ

៦៦៥. សាវត្ថិនិទានំ. ‘‘ចត្តារោមេ, ភិក្ខវេ, ឈាយី. កតមេ ចត្តារោ? ឥធ, ភិក្ខវេ, ឯកច្ចោ ឈាយី សមាធិស្មិំ សមាធិកុសលោ ហោតិ, ន សមាធិស្មិំ កល្លិតកុសលោ. ឥធ បន, ភិក្ខវេ, ឯកច្ចោ ឈាយី សមាធិស្មិំ កល្លិតកុសលោ ហោតិ, ន សមាធិស្មិំ សមាធិកុសលោ. ឥធ បន, ភិក្ខវេ, ឯកច្ចោ ឈាយី នេវ សមាធិស្មិំ សមាធិកុសលោ ហោតិ, ន ច សមាធិស្មិំ កល្លិតកុសលោ. ឥធ បន, ភិក្ខវេ, ឯកច្ចោ ឈាយី សមាធិស្មិំ សមាធិកុសលោ ច ហោតិ, សមាធិស្មិំ កល្លិតកុសលោ ច. តត្រ, ភិក្ខវេ, យ្វាយំ ឈាយី សមាធិស្មិំ សមាធិកុសលោ ច ហោតិ សមាធិស្មិំ កល្លិតកុសលោ ច អយំ ឥមេសំ ចតុន្នំ ឈាយីនំ អគ្គោ ច សេដ្ឋោ ច មោក្ខោ ច ឧត្តមោ ច បវរោ ច. សេយ្យថាបិ, ភិក្ខវេ, គវា ខីរំ…បេ… បវរោ ចា’’តិ. ចតុត្ថំ.