៧. សុភូតិសុត្តំ

៥៧. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន អាយស្មា សុភូតិ ភគវតោ អវិទូរេ និសិន្នោ ហោតិ បល្លង្កំ អាភុជិត្វា ឧជុំ កាយំ បណិធាយ អវិតក្កំ សមាធិំ សមាបជ្ជិត្វា.

អទ្ទសា ខោ ភគវា អាយស្មន្តំ សុភូតិំ អវិទូរេ និសិន្នំ បល្លង្កំ អាភុជិត្វា ឧជុំ កាយំ បណិធាយ អវិតក្កំ សមាធិំ សមាបន្នំ.

អថ ខោ ភគវា ឯតមត្ថំ វិទិត្វា តាយំ វេលាយំ ឥមំ ឧទានំ ឧទានេសិ –

‘‘យស្ស វិតក្កា វិធូបិតា,

អជ្ឈត្តំ សុវិកប្បិតា អសេសា;

តំ សង្គមតិច្ច អរូបសញ្ញី,

ចតុយោគាតិគតោ ន ជាតុ មេតី’’តិ [ន ជាតិមេតីតិ (ស្យា. បី. អដ្ឋ. បាឋន្តរំ)]. សត្តមំ;