១០. ចូឡបន្ថកសុត្តំ

៥០. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន អាយស្មា ចូឡបន្ថកោ [ចុល្លបន្ថកោ (សី.), ចូលបន្ថកោ (បី.)] ភគវតោ អវិទូរេ និសិន្នោ ហោតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា.

អទ្ទសា ខោ ភគវា អាយស្មន្តំ ចូឡបន្ថកំ អវិទូរេ និសិន្នំ បល្លង្កំ អាភុជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា.

អថ ខោ ភគវា ឯតមត្ថំ វិទិត្វា តាយំ វេលាយំ ឥមំ ឧទានំ ឧទានេសិ –

‘‘ឋិតេន កាយេន ឋិតេន ចេតសា,

តិដ្ឋំ និសិន្នោ ឧទ វា សយានោ;

ឯតំ [ឯវំ (ក.)] សតិំ ភិក្ខុ អធិដ្ឋហានោ,

លភេថ បុព្ពាបរិយំ វិសេសំ;

លទ្ធាន បុព្ពាបរិយំ វិសេសំ,

អទស្សនំ មច្ចុរាជស្ស គច្ឆេ’’តិ. ទសមំ;

សោណវគ្គោ [សោណថេរវគ្គោ (ស្យា. កំ. ក.) មហាវគ្គោ (អដ្ឋកថាយ សមេតិ)] បញ្ចមោ និដ្ឋិតោ.