៨. បុណ្ណិកាថេរីអបទានំ

១៨៤. ‘‘វិបស្សិនោ ភគវតោ, សិខិនោ វេស្សភុស្ស ច;

កកុសន្ធស្ស មុនិនោ, កោណាគមនតាទិនោ.

១៨៥. ‘‘កស្សបស្ស ច ពុទ្ធស្ស, បព្ពជិត្វាន សាសនេ;

ភិក្ខុនី សីលសម្បន្នា, និបកា សំវុតិន្ទ្រិយា.

១៨៦. ‘‘ពហុស្សុតា ធម្មធរា, ធម្មត្ថបដិបុច្ឆិកា;

ឧគ្គហេតា ច ធម្មានំ, សោតា បយិរុបាសិតា.

១៨៧. ‘‘ទេសេន្តី ជនមជ្ឈេហំ, អហោសិំ ជិនសាសនេ;

ពាហុសច្ចេន តេនាហំ, បេសលា អតិមញ្ញិសំ.

១៨៨. ‘‘បច្ឆិមេ ច ភវេ ទានិ, សាវត្ថិយំ បុរុត្តមេ;

អនាថបិណ្ឌិនោ គេហេ, ជាតាហំ កុម្ភទាសិយា.

១៨៩. ‘‘គតា ឧទកហារិយំ, សោត្ថិយំ ទិជមទ្ទសំ;

សីតដ្ដំ តោយមជ្ឈម្ហិ, តំ ទិស្វា ឥទមព្រវិំ.

១៩០. ‘‘‘ឧទហារី អហំ សីតេ, សទា ឧទកមោតរិំ;

អយ្យានំ ទណ្ឌភយភីតា, វាចាទោសភយដ្ដិតា [វាចារោសភយដ្ដិតា (ស្យា.)].

១៩១. ‘‘‘កស្ស ព្រាហ្មណ ត្វំ ភីតោ, សទា ឧទកមោតរិ;

វេធមានេហិ គត្តេហិ, សីតំ វេទយសេ ភុសំ’.

១៩២. ‘‘‘ជានន្តី វត មំ ភោតិ, បុណ្ណិកេ បរិបុច្ឆសិ;

ករោន្តំ កុសលំ កម្មំ, រុន្ធន្តំ [និទ្ធន្តំ (សី. បី.), នុទន្តំ (ស្យា.)] កតបាបកំ.

១៩៣. ‘‘‘យោ ចេ វុឌ្ឍោ ទហរោ វា, បាបកម្មំ បកុព្ពតិ;

ទកាភិសិញ្ចនា សោបិ [ភោតិ (សី. ក.) ថេរីគា. ២៣៩], បាបកម្មា បមុច្ចតិ’.

១៩៤. ‘‘ឧត្តរន្តស្ស អក្ខាសិំ, ធម្មត្ថសំហិតំ បទំ;

តញ្ច សុត្វា ស សំវិគ្គោ [សុសំវិគ្គោ (ស្យា.)], បព្ពជិត្វារហា អហុ.

១៩៥. ‘‘បូរេន្តី ឩនកសតំ, ជាតា ទាសិកុលេ យតោ;

តតោ បុណ្ណាតិ នាមំ មេ, ភុជិស្សំ មំ អកំសុ តេ.

១៩៦. ‘‘សេដ្ឋិំ តតោនុជានេត្វា [តតោ អនុមោទេត្វា (សី. ស្យា.), តតោ អនុមានេត្វា (បី.)], បព្ពជិំ អនគារិយំ;

ន ចិរេនេវ កាលេន, អរហត្តមបាបុណិំ.

១៩៧. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

ចេតោបរិយញាណស្ស, វសី ហោមិ មហាមុនេ.

១៩៨. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

សព្ពាសវបរិក្ខីណា, នត្ថិ ទានិ បុនព្ភវោ.

១៩៩. ‘‘អត្ថធម្មនិរុត្តីសុ, បដិភានេ តថេវ ច;

ញាណំ មេ វិមលំ សុទ្ធំ, ពុទ្ធសេដ្ឋស្ស វាហសា.

២០០. ‘‘ភាវនាយ មហាបញ្ញា, សុតេនេវ សុតាវិនី;

មានេន នីចកុលជា, ន ហិ កម្មំ វិនស្សតិ [បនស្សតិ (ស្យា.)].

២០១. ‘‘កិលេសា ឈាបិតា មយ្ហំ…បេ… វិហរាមិ អនាសវា.

២០២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២០៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ បុណ្ណិកា ភិក្ខុនី ឥមា គាថាយោ អភាសិត្ថាតិ.

បុណ្ណិកាថេរិយាបទានំ អដ្ឋមំ.