១. យសវតីបមុខអដ្ឋារសភិក្ខុនីសហស្សអបទានំ

១. ‘‘ភវា សព្ពេ បរិក្ខីណា, ភវា សន្តិ វិមោចិតា;

សព្ពាសវា ច នោ នត្ថិ, អារោចេម មហាមុនេ.

២. ‘‘បុរិមំ កុសលំ កម្មំ [បរិកម្មញ្ច កុសលំ (ស្យា.)], យំ កិញ្ចិ សាធុបត្ថិតំ;

បរិភោគមយំ ទិន្នំ, តុយ្ហត្ថាយ មហាមុនេ.

៣. ‘‘ពុទ្ធបច្ចេកពុទ្ធានំ, សាវកានញ្ច បត្ថិតំ [ពុទ្ធានំ សាវកានញ្ច (សី. ក.)];

បរិភោគមយំ ទិន្នំ, តុយ្ហត្ថាយ មហាមុនេ.

៤. ‘‘ឧច្ចនីចមយំ កម្មំ, ភិក្ខូនំ សាធុបត្ថិតំ;

ឧច្ចាកុលបរិកម្មំ, កតមេតំ មហាមុនេ [កតម្ហេហិ មហាមុនេ (ស្យា. បី.)].

៥. ‘‘តេនេវ សុក្កមូលេន, ចោទិតា កម្មសម្បទា;

មានុសិកមតិក្កន្តា, ជាយិំសុ ខត្តិយេ កុលេ.

៦. ‘‘ឧប្បត្តេ ច កតេ កម្មេ, ជាតិយា វាបិ ឯកតោ;

បច្ឆិមេ ឯកតោ ជាតា, ខត្តិយា កុលសម្ភវា.

៧. ‘‘រូបវតី ភោគវតី, លាភសក្ការបូជិតា;

អន្តេបុរេ មហាវីរ, ទេវានំ វិយ នន្ទនេ.

៨. ‘‘និព្ពិន្ទិត្វា អគារម្ហា, បព្ពជិម្ហនគារិយំ;

កតិបាហំ ឧបាទាយ, សព្ពា បត្តាម្ហ និព្ពុតិំ.

៩. ‘‘ចីវរំ បិណ្ឌបាតញ្ច, បច្ចយំ សយនាសនំ;

ឧបនេន្តិ ពហូ អម្ហេ, សទា សក្កតបូជិតា.

១០. ‘‘កិលេសា ឈាបិតា អម្ហំ, ភវា សព្ពេ សមូហតា;

នាគីវ ពន្ធនំ ឆេត្វា, វិហរាម អនាសវា.

១១. ‘‘ស្វាគតំ វត នោ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

១២. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ យសវតីបមុខានិ ខត្តិយកញ្ញាភិក្ខុនិយោ អដ្ឋារសសហស្សានិ ភគវតោ សម្មុខា ឥមា គាថាយោ អភាសិត្ថាតិ.

យសវតីបមុខអដ្ឋារសភិក្ខុនីសហស្សាបទានំ បឋមំ.