៦. ឯកបិណ្ឌបាតទាយិកាថេរីអបទានំ

៤៦. ‘‘នគរេ ពន្ធុមតិយា, ពន្ធុមា នាម ខត្តិយោ;

តស្ស រញ្ញោ អហុំ ភរិយា, ឯកជ្ឈំ ចារយាមហំ [ឯកច្ចំ វាទយាមហំ (ស្យា.)].

៤៧. ‘‘រហោគតា និសីទិត្វា, ឯវំ ចិន្តេសហំ តទា;

‘អាទាយ គមនីយញ្ហិ, កុសលំ នត្ថិ មេ កតំ.

៤៨. ‘‘‘មហាភិតាបំ កដុកំ, ឃោររូបំ សុទារុណំ;

និរយំ នូន គច្ឆាមិ, ឯត្ថ មេ នត្ថិ សំសយោ’.

៤៩. ‘‘រាជានំ ឧបសង្កម្ម, ឥទំ វចនមព្រវិំ;

‘ឯកំ មេ សមណំ ទេហិ, ភោជយិស្សាមិ ខត្តិយ’.

៥០. ‘‘អទាសិ មេ មហារាជា, សមណំ ភាវិតិន្ទ្រិយំ;

តស្ស បត្តំ គហេត្វាន, បរមន្នេន បូរយិំ [តប្បយិំ (សី.)].

៥១. ‘‘បូរយិត្វា បរមន្នំ, គន្ធាលេបំ អកាសហំ;

ជាលេន បិទហិត្វាន, វត្ថយុគេន [បីតចោឡេន (ស្យា.), មហានេលេន (បី.)] ឆាទយិំ.

៥២. ‘‘អារម្មណំ មមំ ឯតំ, សរាមិ យាវជីវិហំ;

តត្ថ ចិត្តំ បសាទេត្វា, តាវតិំសមគច្ឆហំ.

៥៣. ‘‘តិំសានំ ទេវរាជូនំ, មហេសិត្តមការយិំ;

មនសា បត្ថិតំ មយ្ហំ, និព្ពត្តតិ យថិច្ឆិតំ [យតិច្ឆកំ (ស្យា.), យទិច្ឆកំ (បី. ក.)].

៥៤. ‘‘វីសានំ ចក្កវត្តីនំ, មហេសិត្តមការយិំ;

ឱចិតត្តាវ [ឧបចិតត្តា (ស្យា.)] ហុត្វាន, សំសរាមិ ភវេស្វហំ.

៥៥. ‘‘សព្ពពន្ធនមុត្តាហំ, អបេតា មេ ឧបាទិកា;

សព្ពាសវបរិក្ខីណា, នត្ថិ ទានិ បុនព្ភវោ.

៥៦. ‘‘ឯកនវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, បិណ្ឌបាតស្សិទំ ផលំ.

៥៧. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៥៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ ឯកបិណ្ឌបាតទាយិកា ភិក្ខុនី ឥមា គាថាយោ អភាសិត្ថាតិ.

ឯកបិណ្ឌបាតទាយិកាថេរិយាបទានំ ឆដ្ឋំ.