១. សុមេធាថេរីអបទានំ

អថ ថេរិកាបទានានិ សុណាថ –

១. ‘‘ភគវតិ កោណាគមនេ, សង្ឃារាមម្ហិ នវនិវេសនម្ហិ [និវេសម្ហិ (ស្យា.)];

សខិយោ តិស្សោ ជនិយោ, វិហារទានំ អទាសិម្ហ.

២. ‘‘ទសក្ខត្តុំ សតក្ខត្តុំ, ទសសតក្ខត្តុំ សតានញ្ច សតក្ខត្តុំ [សតានិ ច សត្តក្ខត្តុំ (សី. ក.)];

ទេវេសុ ឧបបជ្ជិម្ហ, កោ វាទោ មានុសេ ភវេ.

៣. ‘‘ទេវេ មហិទ្ធិកា អហុម្ហ, មានុសកម្ហិ កោ វាទោ;

សត្តរតនមហេសី [សត្តរតនស្ស មហេសី (សី. បី.)], ឥត្ថិរតនំ អហំ ភវិំ.

៤. ‘‘ឥធ សញ្ចិតកុសលា [តត្ថ សញ្ចិតំ កុសលំ (ស្យា.)], សុសមិទ្ធកុលប្បជា;

ធនញ្ជានី ច ខេមា ច, អហម្បិ ច តយោ ជនា.

៥. ‘‘អារាមំ សុកតំ កត្វា, សព្ពាវយវមណ្ឌិតំ;

ពុទ្ធប្បមុខសង្ឃស្ស, និយ្យាទេត្វា សមោទិតា.

៦. ‘‘យត្ថ យត្ថូបបជ្ជាមិ, តស្ស កម្មស្ស វាហសា;

ទេវេសុ អគ្គតំ បត្តា, មនុស្សេសុ តថេវ ច.

៧. ‘‘ឥមស្មិំយេវ កប្បម្ហិ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

៨. ‘‘ឧបដ្ឋាកោ មហេសិស្ស, តទា អាសិ នរិស្សរោ;

កាសិរាជា កិកី នាម, ពារាណសិបុរុត្តមេ.

៩. ‘‘តស្សាសុំ សត្ត ធីតរោ, រាជកញ្ញា សុខេធិតា [សុខេថិតា (ស្យា.)];

ពុទ្ធោបដ្ឋាននិរតា, ព្រហ្មចរិយំ ចរិំសុ តា.

១០. ‘‘តាសំ សហាយិកា ហុត្វា, សីលេសុ សុសមាហិតា;

ទត្វា ទានានិ សក្កច្ចំ, អគារេវ វតំ [អគារេវ វត្តំ (ស្យា.)] ចរិំ.

១១. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសូបគា អហំ.

១២. ‘‘តតោ ចុតា យាមមគំ [យាមសគ្គំ (ស្យា.)], តតោហំ តុសិតំ គតា;

តតោ ច និម្មានរតិំ, វសវត្តិបុរំ តតោ.

១៣. ‘‘យត្ថ យត្ថូបបជ្ជាមិ, បុញ្ញកម្មសមោហិតា;

តត្ថ តត្ថេវ រាជូនំ, មហេសិត្តមការយិំ.

១៤. ‘‘តតោ ចុតា មនុស្សត្តេ, រាជូនំ ចក្កវត្តិនំ;

មណ្ឌលីនញ្ច រាជូនំ, មហេសិត្តមការយិំ.

១៥. ‘‘សម្បត្តិមនុភោត្វាន, ទេវេសុ មានុសេសុ ច;

សព្ពត្ថ សុខិតា ហុត្វា, នេកជាតីសុ សំសរិំ.

១៦. ‘‘សោ ហេតុ ច សោ បភវោ, តម្មូលំ សាសនេ ខមំ [តម្មូលំ សា ច សាសនេ ខន្តិ (សី. បី. ក.)];

បឋមំ តំ សមោធានំ, តំ ធម្មរតាយ និព្ពានំ [និព្ពុតំ (ស្យា.)].

១៧. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគីវ ពន្ធនំ ឆេត្វា, វិហរាមិ អនាសវា.

១៨. ‘‘ស្វាគតំ វត មេ អាសិ, មម ពុទ្ធស្ស [ពុទ្ធសេដ្ឋស្ស (សី. ស្យា. ក.)] សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

១៩. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ សុមេធា ភិក្ខុនី ឥមា គាថាយោ អភាសិត្ថាតិ.

សុមេធាថេរិយាបទានំ បឋមំ.