១៥. សេដ្ឋិបុត្តបេតវត្ថុ

៨០២. [ជា. ១.៤.៥៤ ជាតកេបិ] ‘‘សដ្ឋិវស្សសហស្សានិ, បរិបុណ្ណានិ សព្ពសោ;

និរយេ បច្ចមានានំ, កទា អន្តោ ភវិស្សតិ’’.

៨០៣. [ជា. ១.៤.៥៥ ជាតកេបិ] ‘‘នត្ថិ អន្តោ កុតោ អន្តោ, ន អន្តោ បដិទិស្សតិ;

តថា ហិ បកតំ បាបំ, តុយ្ហំ មយ្ហញ្ច មារិសា [មម តុយ្ហញ្ច មារិស (សី. ស្យា. បី.)].

៨០៤. [ជា. ១.៤.៥៣ ជាតកេបិ] ‘‘ទុជ្ជីវិតមជីវម្ហ, យេ សន្តេ ន ទទម្ហសេ;

សន្តេសុ ទេយ្យធម្មេសុ, ទីបំ នាកម្ហ អត្តនោ.

៨០៥. [ជា. ១.៤.៥៦ ជាតកេបិ] ‘‘សោហំ នូន ឥតោ គន្ត្វា, យោនិំ លទ្ធាន មានុសិំ;

វទញ្ញូ សីលសម្បន្នោ, កាហាមិ កុសលំ ពហុ’’ន្តិ.

សេដ្ឋិបុត្តបេតវត្ថុ បន្នរសមំ.