១២. អម្ពវនបេតវត្ថុ

៧៩៦. ‘‘អយញ្ច តេ បោក្ខរណី សុរម្មា, សមា សុតិត្ថា ច មហោទកា ច;

សុបុប្ផិតា ភមរគណានុកិណ្ណា, កថំ តយា លទ្ធា អយំ មនុញ្ញា.

៧៩៧. ‘‘ឥទញ្ច តេ អម្ពវនំ សុរម្មំ, សព្ពោតុកំ ធារយតេ [ធារយតិ (ស្យា. ក.)] ផលានិ;

សុបុប្ផិតំ ភមរគណានុកិណ្ណំ, កថំ តយា លទ្ធមិទំ វិមានំ’’.

៧៩៨. ‘‘អម្ពបក្កំ ទកំ [អម្ពបក្កោទកំ (សី. ស្យា. បី.), អម្ពបក្កូទកំ (ក.)] យាគុ, សីតច្ឆាយា មនោរមា;

ធីតាយ ទិន្នទានេន, តេន មេ ឥធ លព្ភតិ’’.

៧៩៩. ‘‘សន្ទិដ្ឋិកំ កម្មំ ឯវំ [សន្ទិដ្ឋិកំ ឯវ (ស្យា.)] បស្សថ, ទានស្ស ទមស្ស សំយមស្ស វិបាកំ;

ទាសី អហំ អយ្យកុលេសុ ហុត្វា, សុណិសា ហោមិ អគារស្ស ឥស្សរា’’តិ.

អម្ពវនបេតវត្ថុ ទ្វាទសមំ.