៨. វិបល្លាសកថា

២៣៦. បុរិមនិទានំ. ‘‘ចត្តារោមេ, ភិក្ខវេ [អ. និ. ៤.៤៩ បស្សិតព្ពា], សញ្ញាវិបល្លាសា ចិត្តវិបល្លាសា ទិដ្ឋិវិបល្លាសា. កតមេ ចត្តារោ? អនិច្ចេ, ភិក្ខវេ, និច្ចន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ. ទុក្ខេ, ភិក្ខវេ, សុខន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ. អនត្តនិ, ភិក្ខវេ, អត្តាតិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ. អសុភេ, ភិក្ខវេ, សុភន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ. ឥមេ ខោ, ភិក្ខវេ, ចត្តារោ សញ្ញាវិបល្លាសា ចិត្តវិបល្លាសា ទិដ្ឋិវិបល្លាសា.

‘‘ចត្តារោមេ, ភិក្ខវេ, នសញ្ញាវិបល្លាសា នចិត្តវិបល្លាសា នទិដ្ឋិវិបល្លាសា. កតមេ ចត្តារោ? អនិច្ចេ, ភិក្ខវេ, អនិច្ចន្តិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ. ទុក្ខេ, ភិក្ខវេ, ទុក្ខន្តិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ. អនត្តនិ, ភិក្ខវេ, អនត្តាតិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ. អសុភេ, ភិក្ខវេ, អសុភន្តិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ. ឥមេ ខោ, ភិក្ខវេ, ចត្តារោ នសញ្ញាវិបល្លាសា នចិត្តវិបល្លាសា នទិដ្ឋិវិបល្លាសា’’តិ.

‘‘អនិច្ចេ និច្ចសញ្ញិនោ, ទុក្ខេ ច សុខសញ្ញិនោ;

អនត្តនិ ច អត្តាតិ [អត្តសញ្ញិនោ (ស្យា.) អ. និ. ៤.៤៩ បស្សិតព្ពា], អសុភេ សុភសញ្ញិនោ;

មិច្ឆាទិដ្ឋិហតា សត្តា, ខិត្តចិត្តា វិសញ្ញិនោ.

‘‘តេ យោគយុត្តា មារស្ស, អយោគក្ខេមិនោ ជនា;

សត្តា គច្ឆន្តិ សំសារំ, ជាតិមរណគាមិនោ.

‘‘យទា ច ពុទ្ធា លោកស្មិំ, ឧប្បជ្ជន្តិ បភង្ករា;

តេ ឥមំ ធម្មំ បកាសេន្តិ, ទុក្ខូបសមគាមិនំ.

‘‘តេសំ សុត្វាន សប្បញ្ញា, សចិត្តំ បច្ចលទ្ធុ [បច្ចលទ្ធុំ (ស្យា.), បច្ចលទ្ធា អ. និ. ៤.៤៩] តេ;

អនិច្ចំ អនិច្ចតោ ទក្ខុំ, ទុក្ខមទ្ទក្ខុ ទុក្ខតោ.

‘‘អនត្តនិ អនត្តាតិ, អសុភំ អសុភតទ្ទសុំ;

សម្មាទិដ្ឋិសមាទានា, សព្ពំ ទុក្ខំ ឧបច្ចគុ’’ន្តិ.

ឥមេ ចត្តារោ វិបល្លាសា ទិដ្ឋិសម្បន្នស្ស បុគ្គលស្ស បហីនា, អប្បហីនាតិ. កេចិ បហីនា, កេចិ អប្បហីនា? អនិច្ចេ និច្ចន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ បហីនោ. ទុក្ខេ សុខន្តិ សញ្ញា ឧប្បជ្ជតិ, ចិត្តំ ឧប្បជ្ជតិ, ទិដ្ឋិវិបល្លាសោ បហីនោ. អនត្តនិ អត្តាតិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ បហីនោ. អសុភេ សុភន្តិ សញ្ញា ឧប្បជ្ជតិ, ចិត្តំ ឧប្បជ្ជតិ, ទិដ្ឋិវិបល្លាសោ បហីនោ. ទ្វីសុ វត្ថូសុ ឆ វិបល្លាសា បហីនា. ទ្វីសុ វត្ថូសុ ទ្វេ វិបល្លាសា បហីនា, ចត្តារោ វិបល្លាសា អប្បហីនា. ចតូសុ វត្ថូសុ អដ្ឋ វិបល្លាសា បហីនា, ចត្តារោ វិបល្លាសា អប្បហីនាតិ.

វិបល្លាសកថា និដ្ឋិតា.