៥១. សោតធាតុវិសុទ្ធិញាណនិទ្ទេសោ

១០៣. កថំ វិតក្កវិប្ផារវសេន នានត្តេកត្តសទ្ទនិមិត្តានំ បរិយោគាហណេ បញ្ញា សោតធាតុវិសុទ្ធិញាណំ? ឥធ ភិក្ខុ ឆន្ទសមាធិ…បេ… វីរិយសមាធិ… ចិត្តសមាធិ… វីមំសាសមាធិបធានសង្ខារសមន្នាគតំ ឥទ្ធិបាទំ ភាវេតិ. សោ ឥមេសុ ចតូសុ ឥទ្ធិបាទេសុ ចិត្តំ បរិភាវេតិ បរិទមេតិ, មុទុំ ករោតិ កម្មនិយំ. សោ ឥមេសុ ចតូសុ ឥទ្ធិបាទេសុ ចិត្តំ បរិភាវេត្វា បរិទមេត្វា, មុទុំ ករិត្វា កម្មនិយំ ទូរេបិ សទ្ទានំ សទ្ទនិមិត្តំ មនសិ ករោតិ, សន្តិកេបិ សទ្ទានំ សទ្ទនិមិត្តំ មនសិ ករោតិ, ឱឡារិកានម្បិ សទ្ទានំ សទ្ទនិមិត្តំ មនសិ ករោតិ, សុខុមានម្បិ សទ្ទានំ សទ្ទនិមិត្តំ មនសិ ករោតិ, សណ្ហសណ្ហានម្បិ សទ្ទានំ សទ្ទនិមិត្តំ មនសិ ករោតិ, បុរត្ថិមាយបិ ទិសាយ សទ្ទានំ សទ្ទនិមិត្តំ មនសិ ករោតិ, បច្ឆិមាយបិ ទិសាយ សទ្ទានំ សទ្ទនិមិត្តំ មនសិ ករោតិ, ឧត្តរាយបិ ទិសាយ សទ្ទានំ សទ្ទនិមិត្តំ មនសិ ករោតិ, ទក្ខិណាយបិ ទិសាយ សទ្ទានំ សទ្ទនិមិត្តំ មនសិ ករោតិ, បុរត្ថិមាយបិ អនុទិសាយ សទ្ទានំ សទ្ទនិមិត្តំ មនសិ ករោតិ, បច្ឆិមាយបិ អនុទិសាយ សទ្ទានំ សទ្ទនិមិត្តំ មនសិ ករោតិ, ឧត្តរាយបិ អនុទិសាយ សទ្ទានំ សទ្ទនិមិត្តំ មនសិ ករោតិ, ទក្ខិណាយបិ អនុទិសាយ សទ្ទានំ សទ្ទនិមិត្តំ មនសិ ករោតិ, ហេដ្ឋិមាយបិ ទិសាយ សទ្ទានំ សទ្ទនិមិត្តំ មនសិ ករោតិ, ឧបរិមាយបិ ទិសាយ សទ្ទានំ សទ្ទនិមិត្តំ មនសិ ករោតិ. សោ តថាភាវិតេន ចិត្តេន បរិសុទ្ធេន បរិយោទាតេន សោតធាតុវិសុទ្ធិញាណាយ ចិត្តំ អភិនីហរតិ អភិនិន្នាមេតិ. សោ ទិព្ពាយ សោតធាតុយា វិសុទ្ធាយ អតិក្កន្តមានុសិកាយ ឧភោ សទ្ទេ សុណាតិ – ទិព្ពេ ច មានុសេ ច យេ ទូរេ សន្តិកេ ច. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘វិតក្កវិប្ផារវសេន នានត្តេកត្តសទ្ទនិមិត្តានំ បរិយោគាហណេ បញ្ញា សោតធាតុវិសុទ្ធិញាណំ’’.

សោតធាតុវិសុទ្ធិញាណនិទ្ទេសោ ឯកបញ្ញាសមោ.