៨. និធិកណ្ឌសុត្តំ

១. និធិំ និធេតិ បុរិសោ, គម្ភីរេ ឱទកន្តិកេ;

អត្ថេ កិច្ចេ សមុប្បន្នេ, អត្ថាយ មេ ភវិស្សតិ.

២. រាជតោ វា ទុរុត្តស្ស, ចោរតោ បីឡិតស្ស វា;

ឥណស្ស វា បមោក្ខាយ, ទុព្ភិក្ខេ អាបទាសុ វា;

ឯតទត្ថាយ លោកស្មិំ, និធិ នាម និធីយតិ.

៣. តាវស្សុនិហិតោ [តាវ សុនិហិតោ (សី.)] សន្តោ, គម្ភីរេ ឱទកន្តិកេ;

ន សព្ពោ សព្ពទា ឯវ, តស្ស តំ ឧបកប្បតិ.

៤. និធិ វា ឋានា ចវតិ, សញ្ញា វាស្ស វិមុយ្ហតិ;

នាគា វា អបនាមេន្តិ, យក្ខា វាបិ ហរន្តិ នំ.

៥. អប្បិយា វាបិ ទាយាទា, ឧទ្ធរន្តិ អបស្សតោ;

យទា បុញ្ញក្ខយោ ហោតិ, សព្ពមេតំ វិនស្សតិ.

៦. យស្ស ទានេន សីលេន, សំយមេន ទមេន ច;

និធី សុនិហិតោ ហោតិ, ឥត្ថិយា បុរិសស្ស វា.

៧. ចេតិយម្ហិ ច សង្ឃេ វា, បុគ្គលេ អតិថីសុ វា;

មាតរិ បិតរិ ចាបិ [វាបិ (ស្យា. កំ.)], អថោ ជេដ្ឋម្ហិ ភាតរិ.

៨. ឯសោ និធិ សុនិហិតោ, អជេយ្យោ អនុគាមិកោ;

បហាយ គមនីយេសុ, ឯតំ អាទាយ គច្ឆតិ.

៩. អសាធារណមញ្ញេសំ, អចោរាហរណោ និធិ;

កយិរាថ ធីរោ បុញ្ញានិ, យោ និធិ អនុគាមិកោ.

១០. ឯស ទេវមនុស្សានំ, សព្ពកាមទទោ និធិ;

យំ យទេវាភិបត្ថេន្តិ, សព្ពមេតេន លព្ភតិ.

១១. សុវណ្ណតា សុសរតា, សុសណ្ឋានា សុរូបតា [សុសណ្ឋានសុរូបតា (សី.), សុសណ្ឋានំ សុរូបតា (ស្យា. កំ.)];

អាធិបច្ចបរិវារោ, សព្ពមេតេន លព្ភតិ.

១២. បទេសរជ្ជំ ឥស្សរិយំ, ចក្កវត្តិសុខំ បិយំ;

ទេវរជ្ជម្បិ ទិព្ពេសុ, សព្ពមេតេន លព្ភតិ.

១៣. មានុស្សិកា ច សម្បត្តិ, ទេវលោកេ ច យា រតិ;

យា ច និព្ពានសម្បត្តិ, សព្ពមេតេន លព្ភតិ.

១៤. មិត្តសម្បទមាគម្ម, យោនិសោវ [យោនិសោ វេ (សី.), យោនិសោ ចេ (ស្យា.), យោនិសោ ច (?)] បយុញ្ជតោ;

វិជ្ជា វិមុត្តិ វសីភាវោ, សព្ពមេតេន លព្ភតិ.

១៥. បដិសម្ភិទា វិមោក្ខា ច, យា ច សាវកបារមី;

បច្ចេកពោធិ ពុទ្ធភូមិ, សព្ពមេតេន លព្ភតិ.

១៦. ឯវំ មហត្ថិកា ឯសា, យទិទំ បុញ្ញសម្បទា;

តស្មា ធីរា បសំសន្តិ, បណ្ឌិតា កតបុញ្ញតន្តិ.

និធិកណ្ឌសុត្តំ និដ្ឋិតំ.