៦. មានសុត្តំ

៦. វុត្តញ្ហេតំ ភគវតា, វុត្តមរហតាតិ មេ សុតំ –

‘‘ឯកធម្មំ, ភិក្ខវេ, បជហថ; អហំ វោ បាដិភោគោ អនាគាមិតាយ. កតមំ ឯកធម្មំ? មានំ, ភិក្ខវេ, ឯកធម្មំ បជហថ; អហំ វោ បាដិភោគោ អនាគាមិតាយា’’តិ. ឯតមត្ថំ ភគវា អវោច. តត្ថេតំ ឥតិ វុច្ចតិ –

‘‘យេន មានេន មត្តាសេ, សត្តា គច្ឆន្តិ ទុគ្គតិំ;

តំ មានំ សម្មទញ្ញាយ, បជហន្តិ វិបស្សិនោ;

បហាយ ន បុនាយន្តិ, ឥមំ លោកំ កុទាចន’’ន្តិ.

អយម្បិ អត្ថោ វុត្តោ ភគវតា, ឥតិ មេ សុតន្តិ. ឆដ្ឋំ.