៩. សព្ពផលទាយកត្ថេរអបទានំ

៥១. ‘‘វរុណោ នាម នាមេន, ព្រាហ្មណោ មន្តបារគូ;

ឆឌ្ឌេត្វា ទសបុត្តានិ, វនមជ្ឈោគហិំ តទា.

៥២. ‘‘អស្សមំ សុកតំ កត្វា, សុវិភត្តំ មនោរមំ;

បណ្ណសាលំ ករិត្វាន, វសាមិ វិបិនេ អហំ.

៥៣. ‘‘បទុមុត្តរោ លោកវិទូ, អាហុតីនំ បដិគ្គហោ;

មមុទ្ធរិតុកាមោ សោ, អាគច្ឆិ មម អស្សមំ.

៥៤. ‘‘យាវតា វនសណ្ឌម្ហិ, ឱភាសោ វិបុលោ អហុ;

ពុទ្ធស្ស អានុភាវេន, បជ្ជលី វិបិនំ តទា.

៥៥. ‘‘ទិស្វាន តំ បាដិហីរំ, ពុទ្ធសេដ្ឋស្ស តាទិនោ;

បត្តបុដំ គហេត្វាន, ផលេន បូជយិំ អហំ.

៥៦. ‘‘ឧបគន្ត្វាន សម្ពុទ្ធំ, សហខារិមទាសហំ;

អនុកម្បាយ មេ ពុទ្ធោ, ឥទំ វចនមព្រវិ.

៥៧. ‘ខារិភារំ គហេត្វាន, បច្ឆតោ ឯហិ មេ តុវំ;

បរិភុត្តេ ច សង្ឃម្ហិ, បុញ្ញំ តវ ភវិស្សតិ’.

៥៨. ‘‘បុដកន្តំ គហេត្វាន, ភិក្ខុសង្ឃស្សទាសហំ;

តត្ថ ចិត្តំ បសាទេត្វា, តុសិតំ ឧបបជ្ជហំ.

៥៩. ‘‘តត្ថ ទិព្ពេហិ នច្ចេហិ, គីតេហិ វាទិតេហិ ច;

បុញ្ញកម្មេន សំយុត្តំ, អនុភោមិ សទា សុខំ.

៦០. ‘‘យំ យំ យោនុបបជ្ជាមិ, ទេវត្តំ អថ មានុសំ;

ភោគេ មេ ឩនតា នត្ថិ, ផលទានស្សិទំ ផលំ.

៦១. ‘‘យាវតា ចតុរោ ទីបា, សសមុទ្ទា សបព្ពតា;

ផលំ ពុទ្ធស្ស ទត្វាន, ឥស្សរំ ការយាមហំ.

៦២. ‘‘យាវតា មេ បក្ខិគណា, អាកាសេ ឧប្បតន្តិ ចេ;

តេបិ មំ វសមន្វេន្តិ, ផលទានស្សិទំ ផលំ.

៦៣. ‘‘យាវតា វនសណ្ឌម្ហិ, យក្ខា ភូតា ច រក្ខសា;

កុម្ភណ្ឌា គរុឡា ចាបិ, បារិចរិយំ ឧបេន្តិ មេ.

៦៤. ‘‘កុម្ភា សោណា មធុការា, ឌំសា ច មកសា ឧភោ;

តេបិ មំ វសមន្វេន្តិ, ផលទានស្សិទំ ផលំ.

៦៥. ‘‘សុបណ្ណា នាម សកុណា, បក្ខិជាតា មហព្ពលា;

តេបិ មំ សរណំ យន្តិ, ផលទានស្សិទំ ផលំ.

៦៦. ‘‘យេបិ ទីឃាយុកា នាគា, ឥទ្ធិមន្តោ មហាយសា;

តេបិ មំ វសមន្វេន្តិ, ផលទានស្សិទំ ផលំ.

៦៧. ‘‘សីហា ព្យគ្ឃា ច ទីបី ច, អច្ឆកោកតរច្ឆកា;

តេបិ មំ វសមន្វេន្តិ, ផលទានស្សិទំ ផលំ.

៦៨. ‘‘ឱសធីតិណវាសី ច, យេ ច អាកាសវាសិនោ;

សព្ពេ មំ សរណំ យន្តិ, ផលទានស្សិទំ ផលំ.

៦៩. ‘‘សុទុទ្ទសំ សុនិបុណំ, គម្ភីរំ សុប្បកាសិតំ;

ផស្សយិត្វា [ផុសយិត្វា (ក.)] វិហរាមិ, ផលទានស្សិទំ ផលំ.

៧០. ‘‘វិមោក្ខេ អដ្ឋ ផុសិត្វា, វិហរាមិ អនាសវោ;

អាតាបី និបកោ ចាហំ, ផលទានស្សិទំ ផលំ.

៧១. ‘‘យេ ផលដ្ឋា ពុទ្ធបុត្តា, ខីណទោសា មហាយសា;

អហមញ្ញតរោ តេសំ, ផលទានស្សិទំ ផលំ.

៧២. ‘‘អភិញ្ញាបារមិំ គន្ត្វា, សុក្កមូលេន ចោទិតោ;

សព្ពាសវេ បរិញ្ញាយ, វិហរាមិ អនាសវោ.

៧៣. ‘‘តេវិជ្ជា ឥទ្ធិបត្តា ច, ពុទ្ធបុត្តា មហាយសា;

ទិព្ពសោតសមាបន្នា, តេសំ អញ្ញតរោ អហំ.

៧៤. ‘‘សតសហស្សិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៧៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៧៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សព្ពផលទាយកោ ថេរោ ឥមា គាថាយោ

អភាសិត្ថាតិ.

សព្ពផលទាយកត្ថេរស្សាបទានំ នវមំ.