៧. កុដជបុប្ផិយត្ថេរអបទានំ

៣៧. ‘‘ហិមវន្តស្សាវិទូរេ, វសលោ [ចាវលោ (សី. បី.), អច្ចយោ (ស្យា.)] នាម បព្ពតោ;

ពុទ្ធោ សុទស្សនោ នាម, វសតេ បព្ពតន្តរេ.

៣៨. ‘‘បុប្ផំ ហេមវន្តំ គយ្ហ, វេហាសំ អគមាសហំ;

តត្ថទ្ទសាសិំ សម្ពុទ្ធំ, ឱឃតិណ្ណមនាសវំ.

៣៩. ‘‘បុប្ផំ កុដជមាទាយ, សិរេ កត្វាន អញ្ជលិំ [កត្វានហំ តទា (ស្យា. បី. ក.)];

ពុទ្ធស្ស អភិរោបេសិំ, សយម្ភុស្ស មហេសិនោ.

៤០. ‘‘ឯកតិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កុដជបុប្ផិយោ ថេរោ ឥមា គាថាយោ

អភាសិត្ថាតិ.

កុដជបុប្ផិយត្ថេរស្សាបទានំ សត្តមំ.