៣. ឧក្កាសតិកត្ថេរអបទានំ

៣០. ‘‘កោសិកោ នាម ភគវា, ចិត្តកូដេ វសី តទា;

ឈាយី ឈានរតោ ពុទ្ធោ, វិវេកាភិរតោ មុនិ.

៣១. ‘‘អជ្ឈោគាហេត្វា [អជ្ឈោគហេត្វា (សី. ស្យា. បី.)] ហិមវន្តំ, នារីគណបុរក្ខតោ;

អទ្ទសំ កោសិកំ ពុទ្ធំ, បុណ្ណមាយេវ ចន្ទិមំ.

៣២. ‘‘ឧក្កាសតេ គហេត្វាន, បរិវារេសហំ តទា;

សត្តរត្តិន្ទិវំ ឋត្វា [ពុទ្ធោ (ស្យា. ក.)], អដ្ឋមេន អគច្ឆហំ.

៣៣. ‘‘វុដ្ឋិតំ កោសិកំ ពុទ្ធំ, សយម្ភុំ អបរាជិតំ;

បសន្នចិត្តោ វន្ទិត្វា, ឯកំ ភិក្ខំ អទាសហំ.

៣៤. ‘‘តេន កម្មេន ទ្វិបទិន្ទ, លោកជេដ្ឋ នរាសភ;

ឧប្បជ្ជិំ តុសិតេ កាយេ, ឯកភិក្ខាយិទំ ផលំ.

៣៥. ‘‘ទិវសញ្ចេវ រត្តិញ្ច, អាលោកោ ហោតិ មេ សទា;

សមន្តា យោជនសតំ, ឱភាសេន ផរាមហំ.

៣៦. ‘‘បញ្ចបញ្ញាសកប្បម្ហិ, ចក្កវត្តី អហោសហំ;

ចាតុរន្តោ វិជិតាវី, ជម្ពុមណ្ឌស្ស [ជម្ពុសណ្ឌស្ស (បី.)] ឥស្សរោ.

៣៧. ‘‘តទា មេ នគរំ អាសិ, ឥទ្ធំ ផីតំ សុនិម្មិតំ;

តិំសយោជនមាយាមំ, វិត្ថារេន ច វីសតិ.

៣៨. ‘‘សោភណំ នាម នគរំ, វិស្សកម្មេន មាបិតំ;

ទសសទ្ទាវិវិត្តំ តំ, សម្មតាឡសមាហិតំ.

៣៩. ‘‘ន តម្ហិ នគរេ អត្ថិ, វល្លិកដ្ឋញ្ច មត្តិកា;

សព្ពសោណ្ណមយំយេវ, ជោតតេ និច្ចកាលិកំ.

៤០. ‘‘ចតុបាការបរិក្ខិត្តំ, តយោ អាសុំ មណិមយា;

វេមជ្ឈេ តាលបន្តី ច, វិស្សកម្មេន មាបិតា.

៤១. ‘‘ទសសហស្សបោក្ខរញ្ញោ, បទុមុប្បលឆាទិតា;

បុណ្ឌរីកេហិ [បុណ្ឌរីកាទិ (ស្យា.)] សញ្ឆន្នា, នានាគន្ធសមីរិតា.

៤២. ‘‘ចតុន្នវុតិតោ កប្បេ, យំ ឧក្កំ ធារយិំ អហំ;

ទុគ្គតិំ នាភិជានាមិ, ឧក្កធារស្សិទំ ផលំ.

៤៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧក្កាសតិកោ ថេរោ ឥមា គាថាយោ

អភាសិត្ថាតិ.

ឧក្កាសតិកត្ថេរស្សាបទានំ តតិយំ.