១. នឡមាលិយត្ថេរអបទានំ

១. ‘‘សុវណ្ណវណ្ណំ សម្ពុទ្ធំ, អាហុតីនំ បដិគ្គហំ;

វិបិនគ្គេន គច្ឆន្តំ, អទ្ទសំ លោកនាយកំ.

២. ‘‘នឡមាលំ គហេត្វាន, និក្ខមន្តោ ច តាវទេ;

តត្ថទ្ទសាសិំ សម្ពុទ្ធំ, ឱឃតិណ្ណមនាសវំ.

៣. ‘‘បសន្នចិត្តោ សុមនោ, នឡមាលមបូជយិំ;

ទក្ខិណេយ្យំ មហាវីរំ, សព្ពលោកានុកម្បកំ.

៤. ‘‘ឯកតិំសេ ឥតោ កប្បេ, យំ មាលមភិរោបយិំ [បុប្ផមភិរោបយិំ (សី. ស្យា. បី.)];

ទុគ្គតិំ នាភិជានាមិ, ពុទ្ធបូជាយិទំ ផលំ.

៥. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៦. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៧. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា នឡមាលិយោ ថេរោ ឥមា គាថាយោ

អភាសិត្ថាតិ.

នឡមាលិយត្ថេរស្សាបទានំ បឋមំ.