១. ជគតិទាយកត្ថេរអបទានំ

១. ‘‘ធម្មទស្សិស្ស មុនិនោ, ពោធិយា បាទបុត្តមេ;

បសន្នចិត្តោ សុមនោ, ជគតិំ ការយិំ អហំ.

២. ‘‘ទរិតោ បព្ពតតោ វា, រុក្ខតោ បតិតោ អហំ;

ចុតោ បតិដ្ឋំ វិន្ទាមិ, ជគតិយា ឥទំ ផលំ.

៣. ‘‘ន មេ ចោរា វិហេសន្តិ, នាតិមញ្ញន្តិ ខត្តិយា [បសហន្តិ, នាតិមញ្ញតិ ខត្តិយោ (សី. បី.)];

សព្ពាមិត្តេតិក្កមាមិ, ជគតិយា ឥទំ ផលំ.

៤. ‘‘យំ យំ យោនុបបជ្ជាមិ, ទេវត្តំ អថ មានុសំ;

សព្ពត្ថ បូជិតោ ហោមិ, ជគតិយា ឥទំ ផលំ.

៥. ‘‘អដ្ឋារសេ កប្បសតេ, ជគតិំ ការយិំ អហំ;

ទុគ្គតិំ នាភិជានាមិ, ជគតិទានស្សិទំ ផលំ.

៦. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៧. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៨. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ជគតិទាយកោ ថេរោ ឥមា គាថាយោ

អភាសិត្ថាតិ.

ជគតិទាយកត្ថេរស្សាបទានំ បឋមំ.