៩. សោណកោដិវីសត្ថេរអបទានំ

៤៩. ‘‘វិបស្សិនោ បាវចនេ, ឯកំ លេណំ មយា កតំ;

ចាតុទ្ទិសស្ស សង្ឃស្ស, ពន្ធុមារាជធានិយា.

៥០. ‘‘ទុស្សេហិ ភូមិំ លេណស្ស, សន្ថរិត្វា បរិច្ចជិំ;

ឧទគ្គចិត្តោ សុមនោ, អកាសិំ បណិធិំ តទា.

៥១. ‘‘អារាធយេយ្យំ សម្ពុទ្ធំ, បព្ពជ្ជញ្ច លភេយ្យហំ;

អនុត្តរញ្ច និព្ពានំ, ផុសេយ្យំ សន្តិមុត្តមំ.

៥២. ‘‘តេនេវ សុក្កមូលេន, កប្បេ [កប្បំ (សី.), កប្ប (ក.)] នវុតិ សំសរិំ;

ទេវភូតោ មនុស្សោ ច, កតបុញ្ញោ វិរោចហំ.

៥៣. ‘‘តតោ កម្មាវសេសេន, ឥធ បច្ឆិមកេ ភវេ;

ចម្បាយំ អគ្គសេដ្ឋិស្ស, ជាតោម្ហិ ឯកបុត្តកោ.

៥៤. ‘‘ជាតមត្តស្ស មេ សុត្វា, បិតុ ឆន្ទោ អយំ អហុ;

ទទាមហំ កុមារស្ស, វីសកោដី អនូនកា.

៥៥. ‘‘ចតុរង្គុលា ច មេ លោមា, ជាតា បាទតលេ ឧភោ;

សុខុមា មុទុសម្ផស្សា, តូលាបិចុសមា សុភា.

៥៦. ‘‘អតីតា នវុតិ កប្បា, អយំ ឯកោ ច ឧត្តរិ;

នាភិជានាមិ និក្ខិត្តេ, បាទេ ភូម្យា អសន្ថតេ.

៥៧. ‘‘អារាធិតោ មេ សម្ពុទ្ធោ, បព្ពជិំ អនគារិយំ;

អរហត្តញ្ច មេ បត្តំ, សីតិភូតោម្ហិ និព្ពុតោ.

៥៨. ‘‘អគ្គោ អារទ្ធវីរិយានំ, និទ្ទិដ្ឋោ សព្ពទស្សិនា;

ខីណាសវោម្ហិ អរហា, ឆឡភិញ្ញោ មហិទ្ធិកោ.

៥៩. ‘‘ឯកនវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, លេណទានស្សិទំ ផលំ.

៦០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៦១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៦២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

៦៣. ‘‘ថេរោ កោដិវីសោ [កោដិវិសោ (ស្យា. ក.), កោឡិវិសោ (អញ្ញដ្ឋានេសុ)] សោណោ, ភិក្ខុសង្ឃស្ស អគ្គតោ;

បញ្ហំ បុដ្ឋោ វិយាកាសិ, អនោតត្តេ មហាសរេ’’តិ.

ឥត្ថំ សុទំ អាយស្មា សោណោ កោដិវីសោ ថេរោ ឥមា គាថាយោ អភាសិត្ថាតិ.

សោណកោដិវីសត្ថេរស្សាបទានំ នវមំ.