៧. កទលិផលទាយកត្ថេរអបទានំ

៣៧. ‘‘កណិការំវ ជលិតំ, បុណ្ណមាយេវ [បុណ្ណមាសេវ (សី. ក.)] ចន្ទិមំ;

ជលន្តំ ទីបរុក្ខំវ, អទ្ទសំ លោកនាយកំ.

៣៨. ‘‘កទលិផលំ បគ្គយ្ហ, អទាសិំ សត្ថុនោ អហំ;

បសន្នចិត្តោ សុមនោ, វន្ទិត្វាន អបក្កមិំ.

៣៩. ‘‘ឯកត្តិំសេ ឥតោ កប្បេ, យំ ផលមទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៤០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កទលិផលទាយកោ ថេរោ ឥមា គាថាយោ អភាសិត្ថាតិ.

កទលិផលទាយកត្ថេរស្សាបទានំ សត្តមំ.