១. អវដផលទាយកត្ថេរអបទានំ

១. ‘‘សតរំសិ នាម ភគវា, សយម្ភូ អបរាជិតោ;

វិវេកកាមោ សម្ពុទ្ធោ, គោចរាយាភិនិក្ខមិ.

២. ‘‘ផលហត្ថោ អហំ ទិស្វា, ឧបគច្ឆិំ នរាសភំ;

បសន្នចិត្តោ សុមនោ, អវដំ [អវណ្ដំ (សី.), អម្ពដំ (ស្យា.)] អទទិំ ផលំ.

៣. ‘‘ចតុន្នវុតិតោ កប្បេ, យំ ផលមទទិំ អហំ;

ទុគ្គតិំ នាភិជានាមិ, ផលទានស្សិទំ ផលំ.

៤. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៥. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា អវដផលទាយកោ ថេរោ ឥមា គាថាយោ អភាសិត្ថាតិ.

អវដផលទាយកត្ថេរស្សាបទានំ បឋមំ.