២. ទុតិយអនិយតសិក្ខាបទវណ្ណនា

៤៥២. តេន សមយេន ពុទ្ធោ ភគវាតិ ទុតិយអនិយតសិក្ខាបទំ. តត្ថ ភគវតា បដិក្ខិត្តន្តិអាទិម្ហិ ‘‘យំ ឯកោ ឯកាយ រហោ បដិច្ឆន្នេ អាសនេ អលំកម្មនិយេ និសជ្ជំ កប្បេយ្យ, តំ និសជ្ជំ កប្បេតុំ បដិក្ខិត្ត’’ន្តិ ឯវំ សម្ពន្ធោ វេទិតព្ពោ. ឥតរថា ហិ ‘‘ឯកស្ស ឯកាយា’’តិ វត្តព្ពំ សិយា, កស្មា? ‘‘បដិក្ខិត្ត’’ន្តិ វុត្តត្តា. សាមិអត្ថេ វា ឯតំ បច្ចត្តវចនំ វេទិតព្ពំ.

៤៥៣. ន ហេវ ខោ បន បដិច្ឆន្នន្តិ ឯត្ថ បន យម្បិ ពហិ បរិក្ខិត្តំ អន្តោ វិវដំ បរិវេណង្គណាទិ, តម្បិ អន្តោគធន្តិ វេទិតព្ពំ. ឯវរូបញ្ហិ ឋានំ អប្បដិច្ឆន្នេយេវ គហិតន្តិ មហាបច្ចរិយំ វុត្តំ. សេសំ បឋមសិក្ខាបទនយេនេវ វេទិតព្ពំ. កេវលញ្ហិ ឥធ ឥត្ថីបិ បុរិសោបិ យោ កោចិ វិញ្ញូ អនន្ធោ អពធិរោ អន្តោទ្វាទសហត្ថេ ឱកាសេ ឋិតោ វា និសិន្នោ វា វិក្ខិត្តោបិ និទ្ទាយន្តោបិ អនាបត្តិំ ករោតិ. ពធិរោ បន ចក្ខុមាបិ អន្ធោ វា អពធិរោបិ ន ករោតិ. បារាជិកាបត្តិញ្ច បរិហាបេត្វា ទុដ្ឋុល្លវាចាបត្តិ វុត្តាតិ អយំ វិសេសោ. សេសំ បុរិមសទិសមេវ. ឧភយត្ថាបិ ឧម្មត្តកអាទិកម្មិកានំ អនាបត្តិ.

សមុដ្ឋានាទីសុ ឥទំសិក្ខាបទំ តិសមុដ្ឋានំ – កាយចិត្តតោ, វាចាចិត្តតោ, កាយវាចាចិត្តតោ ច សមុដ្ឋាតិ. កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, វចីកម្មំ, អកុសលចិត្តំ, សុខមជ្ឈត្តវេទនាហិ ទ្វិវេទនំ. សេសំ ឧត្តានត្ថមេវាតិ.

ទុតិយអនិយតសិក្ខាបទវណ្ណនា និដ្ឋិតា.

សមន្តបាសាទិកាយ វិនយសំវណ្ណនាយ

អនិយតវណ្ណនា និដ្ឋិតា.