៨. អនុរុទ្ធសំយុត្តំ

១. រហោគតវគ្គោ

១-២. បឋមរហោគតសុត្តាទិវណ្ណនា

៨៩៩-៩០០. អនុរុទ្ធសំយុត្តស្ស បឋមេ អារទ្ធាតិ បរិបុណ្ណា. សង្ខេបតោ បនេត្ថ ឆត្តិំសាយ ឋានេសុ អរហត្តំ បាបេត្វា វិបស្សនា កថិតា, ទុតិយេ ទ្វាទសសុ ឋានេសុ អរហត្តំ បាបេត្វា វិបស្សនា កថិតា.

៣. សុតនុសុត្តវណ្ណនា

៩០១. តតិយេ មហាភិញ្ញតន្តិ ឆអភិញ្ញាភាវំ. ហីនំ ធម្មន្តិអាទីសុ ឥមាយ បាឡិយា អត្ថោ វេទិតព្ពោ –

‘‘កតមេ ធម្មា ហីនា? ទ្វាទស អកុសលចិត្តុប្បាទា, ឥមេ ធម្មា ហីនា. កតមេ ធម្មា មជ្ឈិមា? តីសុ ភូមីសុ កុសលំ, តីសុ ភូមីសុ វិបាកោ, តីសុ ភូមីសុ កិរិយាព្យាកតំ សព្ពញ្ច រូបំ, ឥមេ ធម្មា មជ្ឈិមា. កតមេ ធម្មា បណីតា? ចត្តារោ មគ្គា អបរិយាបន្នា, ចត្តារិ ច សាមញ្ញផលានិ និព្ពានញ្ច, ឥមេ ធម្មា បណីតា’’តិ (ធ. ស. ១៤២៣-១៤២៥).

៤-៧. បឋមកណ្ឌកីសុត្តាទិវណ្ណនា

៩០២-៩០៥. ចតុត្ថេ កណ្ឌកីវនេតិ មហាករមន្ទវនេ. ឆដ្ឋេ សហស្សំ លោកន្តិ ឥមិនា ថេរស្ស សតត វិហារោ ទស្សិតោ. ថេរោ ហិ បាតោវ មុខំ ធោវិត្វា អតីតានាគតេ កប្បសហស្សំ អនុស្សរតិ. បច្ចុប្បន្នេ បន ទសចក្កវាឡសហស្សំ ឯកាវជ្ជនស្ស អាបាថមាគច្ឆតិ. សត្តមំ ឧត្តានមេវ.

៨. សលឡាគារសុត្តវណ្ណនា

៩០៦. អដ្ឋមេ សលឡាគារេតិ សលឡរុក្ខមយាយ បណ្ណសាលាយ, សលឡរុក្ខស្ស វា ទ្វារេ ឋិតត្តា ឯវំនាមកេ អគារេ. ឥមស្មិំ សុត្តេ វិបស្សនាយ សទ្ធិំ វិបស្សកបុគ្គលោ កថិតោ.

៩. អម្ពបាលិវនសុត្តវណ្ណនា

៩០៧. នវមេ អាសភិំ វាចន្តិ អត្តនោ អរហត្តភាវទីបកំ ឧត្តមវាចំ. សេសំ សព្ពត្ថ ឧត្តានត្ថមេវាតិ.

រហោគតវគ្គោ បឋមោ.

២. ទុតិយវគ្គវណ្ណនា

៩០៩-៩២២. ទុតិយវគ្គេ ឋានញ្ច ឋានតោតិអាទីហិ ថេរោ ទសពលញាណំ បដិជានាតិ. កិម្បនេតំ សាវកានំ ហោតីតិ? ឯកទេសេន ហោតិ, សព្ពញ្ញុពុទ្ធានំ បនេតំ និប្បទេសំ សព្ពាការបរិបូរន្តិ.

អនុរុទ្ធសំយុត្តវណ្ណនា និដ្ឋិតា.