៣. សីលដ្ឋិតិវគ្គោ

១-២. សីលសុត្តាទិវណ្ណនា

៣៨៧-៣៨៨. តតិយវគ្គស្ស បឋមេ សីលានីតិ ចតុបារិសុទ្ធិសីលានិ. ទុតិយេ ឧម្មង្គោតិ បញ្ហមគ្គោ បញ្ហគវេសនំ.

៣-៥. បរិហានសុត្តាទិវណ្ណនា

៣៨៩-៣៩១. តតិយេ បរិហានំ ហោតីតិ បុគ្គលវសេន បរិហានំ ហោតិ. យោ ហិ ពុទ្ធេសុ ធរន្តេសុបិ ចត្តារោ សតិបដ្ឋានេ ន ភាវេតិ, តស្ស សទ្ធម្មោ អន្តរហិតោ នាម ហោតិ ទេវទត្តាទីនំ វិយ. ឥតិ ឥមស្មិំ សុត្តេ តស្ស បុគ្គលស្សេវ ធម្មន្តរធានំ កថិតំ. ចតុត្ថបញ្ចមេសុ សព្ពំ ឧត្តានមេវ.

៦. បទេសសុត្តវណ្ណនា

៣៩២. ឆដ្ឋេ បទេសំ ភាវិតត្តាតិ បទេសតោ ភាវិតត្តា. ចត្តារោ ហិ មគ្គេ តីណិ ច ផលានិ និព្ពត្តេន្តេន សតិបដ្ឋានា បទេសំ ភាវិតា នាម ហោន្តិ.

៧. សមត្តសុត្តវណ្ណនា

៣៩៣. សត្តមេ សមត្តំ ភាវិតត្តាតិ សមត្តា ភាវិតត្តា. អរហត្តផលំ ឧប្បាទេន្តេន ហិ សតិបដ្ឋានា សមត្តំ ភាវិតា នាម ហោន្តិ.

៨-១០. លោកសុត្តាទិវណ្ណនា

៣៩៤-៣៩៦. អដ្ឋមេ មហាភិញ្ញតន្តិ ឆន្នំ អភិញ្ញានំ វសេន វុត្តំ. សហស្សំ លោកំ អភិជានាមីតិ សតតវិហារវសេនេវ វុត្តំ. ថេរោ កិរ បាតោវ ឧដ្ឋាយ មុខំ ធោវិត្វា សេនាសនេ និសិន្នោ អតីតេ កប្បសហស្សំ, អនាគតេ កប្បសហស្សំ អនុស្សរតិ, បច្ចុប្បន្នេបិ សហស្សំ ចក្កវាឡានំ តស្សាវជ្ជនស្ស គតិំ អនុពន្ធតិ. ឥតិ សោ ទិព្ពេន ចក្ខុនា សហស្សំ លោកំ អភិជានាតិ, អយមស្ស សតតវិហារោ. សេសំ សព្ពត្ថ ឧត្តានត្ថមេវាតិ.

សីលដ្ឋិតិវគ្គោ តតិយោ.