៨. ព្រហ្មសុត្តវណ្ណនា

៣៨៤. អដ្ឋមេ កាយេ វា ភិក្ខូតិ តស្មិំ កាលេ ភិក្ខុយេវ នត្ថិ, ឯវំ សន្តេបិ យោ សតិបដ្ឋានេ ភាវេតិ, សោ កិលេសភិន្ទនេន ភិក្ខុយេវាតិ ទស្សេន្តោ ឯវមាហ. ឯកាយនន្តិ ឯកមគ្គំ. ជាតិក្ខយន្តទស្សីតិ ជាតិយា ខយោតិ ច អន្តោតិ ច និព្ពានំ, តំ បស្សតីតិ អត្ថោ. មគ្គំ បជានាតីតិ ឯកាយនសង្ខាតំ ឯកមគ្គភូតំ មគ្គំ បជានាតិ. ឯកាយនមគ្គោ វុច្ចតិ បុព្ពភាគសតិបដ្ឋានមគ្គោ, តំ បជានាតីតិ អត្ថោ.