និគមនកថា

ឯត្តាវតា ហិ –

‘‘ពហុការស្ស យតីនំ វិបស្សនាចារនិបុណពុទ្ធីនំ,

សំយុត្តវរនិកាយស្ស អត្ថសំវណ្ណនំ កាតុំ.

‘‘សទ្ធម្មស្ស ចិរដ្ឋិតិមាសិសមានេន យា មយា;

និបុណា អដ្ឋកថា អារទ្ធា សារត្ថបកាសិនី នាម.

‘‘សា ហិ មហាអដ្ឋកថាយ សារមាទាយ និដ្ឋិតា ឯសា;

អដ្ឋសត្តតិមត្តាយ បាឡិយា ភាណវារេហិ.

‘‘ឯកូនសដ្ឋិមត្តោ វិសុទ្ធិមគ្គោបិ ភាណវារេហិ;

អត្ថប្បកាសនត្ថាយ អាគមានំ កតោ យស្មា.

‘‘តស្មា តេន សហាយំ អដ្ឋកថា ភាណវារគណនាយ;

ថោកេន អបរិបូរំ សត្តតិំសសតំ ហោតិ.

‘‘សត្តតិំសាធិកសត-បរិមាណំ ភាណវារតោ ឯវំ;

សមយំ បកាសយន្តិំ មហាវិហារាធិវាសីនំ.

‘‘មូលដ្ឋកថាយ សារមាទាយ មយា ឥមំ ករោន្តេន;

យំ បុញ្ញមុបចិតំ តេន ហោតុ សព្ពោ សុខី លោកោ.

‘‘ឯតិស្សា ករណត្ថំ ថេរេន ភទន្តជោតិបាលេន;

សុចិសីលេន សុភាសិតស្ស បកាសយន្តញាណេន.

‘‘សាសនវិភូតិកាមេន យាចមានេន មំ សុភគុណេន;

យំ សមធិគតំ បុញ្ញំ តេនាបិ ជនោ សុខី ភវតូ’’តិ.

បរមវិសុទ្ធសទ្ធាពុទ្ធិវីរិយប្បដិមណ្ឌិតេន សីលាចារជ្ជវមទ្ទវាទិគុណសមុទយសមុទិតេន សកសមយសមយន្តរគហនជ្ឈោគាហណសមត្ថេន បញ្ញាវេយ្យត្តិយសមន្នាគតេន តិបិដកបរិយត្តិប្បភេទេ សាដ្ឋកថេ សត្ថុសាសនេ អប្បដិហតញាណប្បភាវេន មហាវេយ្យាករណេន ករណសម្បត្តិជនិតសុខវិនិគ្គតមធុរោទារវចនលាវណ្ណយុត្តេន យុត្តមុត្តវាទិនា វាទីវរេន មហាកវិនា បភិន្នបដិសម្ភិទាបរិវារេ ឆឡភិញ្ញាទិប្បភេទគុណប្បដិមណ្ឌិតេ ឧត្តរិមនុស្សធម្មេ សុប្បតិដ្ឋិតពុទ្ធីនំ ថេរវំសប្បទីបានំ ថេរានំ មហាវិហារវាសីនំ វំសាលង្ការភូតេន វិបុលវិសុទ្ធពុទ្ធិនា ពុទ្ធឃោសោតិ គរូហិ គហិតនាមធេយ្យេន ថេរេន កតា អយំ សារត្ថប្បកាសិនី នាម សំយុត្តនិកាយដ្ឋកថា.

‘‘តាវ តិដ្ឋតុ លោកស្មិំ, លោកនិត្ថរណេសិនំ;

ទស្សេន្តី កុលបុត្តានំ, នយំ សីលវិសុទ្ធិយា.

‘‘យាវ ពុទ្ធោតិ នាមម្បិ, សុទ្ធចិត្តស្ស តាទិនោ;

លោកម្ហិ លោកជេដ្ឋស្ស, បវត្តតិ មហេសិនោ’’តិ.

សារត្ថប្បកាសិនី នាម

សំយុត្តនិកាយ-អដ្ឋកថា សព្ពាការេន និដ្ឋិតា.