១១. ឱឃវគ្គោ

១-២. ឱឃសុត្តាទិវណ្ណនា

១៧២-១៧៣. ឱឃវគ្គេ កាមោឃោតិ បញ្ចសុ កាមគុណេសុ ឆន្ទរាគោ. ភវោឃោតិ រូបារូបភវេសុ ឆន្ទរាគោ. ទិដ្ឋោឃោតិ ទ្វាសដ្ឋិ ទិដ្ឋិយោ. អវិជ្ជោឃោតិ ចតូសុ សច្ចេសុ អញ្ញាណំ. កាមយោគាទីសុបិ ឯសេវ នយោ.

៣-៤. ឧបាទានសុត្តាទិវណ្ណនា

១៧៤-១៧៥. កាមុបាទានន្តិ កាមគ្គហណំ. ទិដ្ឋុបាទានាទីសុបិ ឯសេវ នយោ. គន្ថាតិ គន្ថនា ឃដនា. កាយគន្ថោតិ នាមកាយស្ស គន្ថោ គន្ថនឃដនកិលេសោ. ឥទំសច្ចាភិនិវេសោតិ អន្តគ្គាហិកទិដ្ឋិវសេន ឧប្បន្នោ ‘‘ឥទមេវ សច្ច’’ន្តិ ឯវំ អភិនិវេសោ.

៥-១០. អនុសយសុត្តាទិវណ្ណនា

១៧៦-១៨១. កាមរាគានុសយោតិ ថាមគតដ្ឋេន កាមរាគោវ អនុសយោ កាមរាគានុសយោ. សេសេសុបិ ឯសេវ នយោ. ឱរម្ភាគិយានីតិ ហេដ្ឋាកោដ្ឋាសិយានិ. សំយោជនានីតិ ពន្ធនានិ. ឧទ្ធម្ភាគិយានីតិ ឧបរិកោដ្ឋាសិយានិ. សេសំ សព្ពត្ថ ឧត្តានត្ថមេវាតិ.

ឱឃវគ្គោ ឯកាទសមោ.

មគ្គសំយុត្តវណ្ណនា និដ្ឋិតា.