៩. នាគសុត្តវណ្ណនា

២៣១. នវមេ អតិវេលន្តិ អតិក្កន្តវេលំ កាលំ អតិក្កន្តប្បមាណំ កាលំ. កិមង្គំ បនាហន្តិ អហំ បន កិំការណា ន ឧបសង្កមិស្សាមិ? ភិសមុឡាលន្តិ ភិសញ្ចេវ មុឡាលញ្ច. អព្ពុហេត្វាតិ ឧទ្ធរិត្វា. ភិង្កច្ឆាបាតិ ហត្ថិបោតកា. តេ កិរ អភិណ្ហំ ភិង្ការសទ្ទំ ករោន្តិ, តស្មា ភិង្កច្ឆាបាតិ វុច្ចន្តិ. បសន្នាការំ ករោន្តីតិ បសន្នេហិ កត្តព្ពាការំ ករោន្តិ, ចត្តារោ បច្ចយេ ទេន្តិ. ធម្មំ ភាសន្តីតិ ឯកំ ទ្វេ ជាតកានិ វា សុត្តន្តេ វា ឧគ្គណ្ហិត្វា អសម្ភិន្នេន សរេន ធម្មំ ទេសេន្តិ. បសន្នាការំ ករោន្តីតិ តេសំ តាយ ទេសនាយ បសន្នា គិហី បច្ចយេ ទេន្តិ. នេវ វណ្ណាយ ហោតិ ន ពលាយាតិ នេវ គុណវណ្ណាយ, ន ញាណពលាយ ហោតិ, គុណវណ្ណេ បន បរិហាយន្តេ សរីរវណ្ណោបិ សរីរពលម្បិ បរិហាយតិ, តស្មា សរីរស្ស នេវ វណ្ណាយ ន ពលាយ ហោតិ. នវមំ.