២. ទុតិយវគ្គោ

១-២. សុវណ្ណបាតិសុត្តាទិវណ្ណនា

១៦៧-១៦៨. ទុតិយវគ្គស្ស បឋមេ សម្បជានមុសា ភាសន្តន្តិ អប្បមត្តកេនបិ ការណេន សម្បជានមេវ មុសា ភាសន្តំ. ‘‘សីលំ បូរេស្សាមី’’តិ សំវិហិតភិក្ខុំ សិនេរុមត្តោបិ បច្ចយរាសិ ចាលេតុំ ន សក្កោតិ. យទា បន សីលំ បហាយ សក្ការនិស្សិតោ ហោតិ, តទា កុណ្ឌកមុដ្ឋិហេតុបិ មុសា ភាសតិ, អញ្ញំ វា អកិច្ចំ ករោតិ. ទុតិយំ ឧត្តានមេវាតិ. បឋមទុតិយានិ.

៣-១០. សុវណ្ណនិក្ខសុត្តាទិវណ្ណនា

១៦៩. តតិយាទីសុ សុវណ្ណនិក្ខស្សាតិ ឯកស្ស កញ្ចននិក្ខស្ស. សិង្គីនិក្ខស្សាតិ សិង្គីសុវណ្ណនិក្ខស្ស. បថវិយាតិ ចក្កវាឡព្ភន្តរាយ មហាបថវិយា. អាមិសកិញ្ចិក្ខហេតូតិ កស្សចិទេវ អាមិសស្ស ហេតុ អន្តមសោ កុណ្ឌកមុដ្ឋិនោបិ. ជីវិតហេតូតិ អដវិយំ ចោរេហិ គហេត្វា ជីវិតេ វោរោបិយមានេ តស្សបិ ហេតុ. ជនបទកល្យាណិយាតិ ជនបទេ ឧត្តមិត្ថិយា. តតិយាទីនិ.

ទុតិយោ វគ្គោ.