៩. វេរម្ភសុត្តវណ្ណនា

១៦៥. នវមេ វេរម្ភវាតាតិ ឯវំនាមកា មហាវាតា. កីទិសេ បន ឋានេ តេ វាតា វាយន្តីតិ? យត្ថ ឋិតស្ស ចត្តារោ ទីបា ឧប្បលិនិបត្តមត្តា ហុត្វា បញ្ញាយន្តិ. យោ បក្ខី គច្ឆតីតិ នវវុដ្ឋេ ទេវេ វិរវន្តោ វាតសកុណោ តត្ថ គច្ឆតិ, តំ សន្ធាយេតំ វុត្តំ. អរក្ខិតេនេវ កាយេនាតិអាទីសុ ហត្ថបាទេ កីឡាបេន្តោ ខន្ធដ្ឋិំ វា នាមេន្តោ កាយំ ន រក្ខតិ នាម, នានាវិធំ ទុដ្ឋុល្លកថំ កថេន្តោ វាចំ ន រក្ខតិ នាម, កាមវិតក្កាទយោ វិតក្កេន្តោ ចិត្តំ ន រក្ខតិ នាម. អនុបដ្ឋិតាយ សតិយាតិ កាយគតាសតិំ អនុបដ្ឋបេត្វា. នវមំ.