៩. ឈានាភិញ្ញសុត្តវណ្ណនា

១៥២. នវមេ យាវទេវ អាកង្ខាមីតិ យាវទេវ ឥច្ឆាមិ. យានិ បន ឥតោ បរំ វិវិច្ចេវ កាមេហីតិអាទិនា នយេន ចត្តារិ រូបាវចរជ្ឈានានិ, សព្ពសោ រូបសញ្ញានំ សមតិក្កមាតិអាទិនា នយេន ចតស្សោ អរូបសមាបត្តិយោ, សព្ពសោ នេវសញ្ញានាសញ្ញាយតនំ សមតិក្កម្ម សញ្ញាវេទយិតនិរោធន្តិ ឯវំ និរោធសមាបត្តិ, អនេកវិហិតំ ឥទ្ធិវិធន្តិអាទិនា នយេន បញ្ច លោកិកាភិញ្ញា ច វុត្តា. តត្ថ យំ វត្តព្ពំ សិយា, តំ សព្ពំ អនុបទវណ្ណនាយ ចេវ ភាវនាវិធានេន ច សទ្ធិំ វិសុទ្ធិមគ្គេ (វិសុទ្ធិ. ១.៦៩) វិត្ថារិតមេវ. ឆឡភិញ្ញាយ បន អាសវានំ ខយាតិ អាសវានំ ខយេន. អនាសវន្តិ អាសវានំ អបច្ចយភូតំ. ចេតោវិមុត្តិន្តិ អរហត្តផលសមាធិំ. បញ្ញាវិមុត្តិន្តិ អរហត្តផលបញ្ញំ. នវមំ.