១៣. បឋមសុណិសាវិមានវណ្ណនា

អភិក្កន្តេន វណ្ណេនាតិ សុណិសាវិមានំ. តស្ស កា ឧប្បត្តិ? សាវត្ថិយំ អញ្ញតរស្មិំ គេហេ ឯកា កុលសុណ្ហា គេហំ បិណ្ឌាយ បវិដ្ឋំ ខីណាសវត្ថេរំ ទិស្វា សញ្ជាតបីតិសោមនស្សា ‘‘ឥទំ មយ្ហំ ឧត្តមំ បុញ្ញក្ខេត្តំ ឧបដ្ឋិត’’ន្តិ អត្តនា លទ្ធំ បូវភាគំ អាទាយ អាទរេន ថេរស្ស ឧបនេសិ, ថេរោ តំ បដិគ្គហេត្វា អនុមោទនំ កត្វា គតោ. សា អបរភាគេ កាលំ កត្វា តាវតិំសភវនេ ឧប្បជ្ជិ. សេសំ សព្ពំ ហេដ្ឋា វុត្តសទិសមេវ. តេន វុត្តំ –

១០៨. ‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;

ឱភាសេន្តី ទិសា សព្ពា, ឱសធី វិយ តារកា.

១០៩. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១១០. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

១១១. ‘‘សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’.

១១២. ‘‘អហំ មនុស្សេសុ មនុស្សភូតា, សុណិសា អហោសិំ សសុរស្ស គេហេ.

១១៣. ‘‘អទ្ទសំ វិរជំ ភិក្ខុំ, វិប្បសន្នមនាវិលំ;

តស្ស អទាសហំ បូវំ, បសន្នា សេហិ បាណិភិ;

ភាគឌ្ឍភាគំ ទត្វាន, មោទាមិ នន្ទនេ វនេ.

១១៤. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

១១៥. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

១១២. តត្ថ សុណិសាតិ បុត្តស្ស ភរិយា. ឥត្ថិយា ហិ សាមិកស្ស បិតា ‘‘សសុរោ’’តិ វុច្ចតិ, តស្ស ច សា ‘‘សុណិសា’’តិ. តំ សន្ធាយ ‘‘សុណិសា អហោសិំ សសុរស្ស គេហេ’’តិ.

១១៣. ភាគឌ្ឍភាគន្តិ អត្តនា លទ្ធបដិវីសតោ ឧបឌ្ឍភាគំ. មោទាមិ នន្ទនេ វនេតិ ថេរេន នន្ទនវនេ ទិដ្ឋតាយ អាហ. សេសំ វុត្តនយមេវ.

សុណិសាវិមានវណ្ណនា និដ្ឋិតា.