៣. បញ្ហាបុច្ឆកវណ្ណនា

២១៥. បញ្ហាបុច្ឆកេ ចតុន្នម្បិ សច្ចានំ ខន្ធវិភង្គេ វុត្តនយានុសារេនេវ កុសលាទិភាវោ វេទិតព្ពោ. អារម្មណត្តិកេសុ បន សមុទយសច្ចំ កាមាវចរធម្មេ អស្សាទេន្តស្ស បរិត្តារម្មណំ ហោតិ, មហគ្គតធម្មេ អស្សាទេន្តស្ស មហគ្គតារម្មណំ, បញ្ញត្តិំ អស្សាទេន្តស្ស នវត្តព្ពារម្មណំ. ទុក្ខសច្ចំ កាមាវចរធម្មេ អារព្ភ ឧប្បន្នំ បរិត្តារម្មណំ, រូបារូបាវចរធម្មេ អារព្ភ ឧប្បត្តិកាលេ មហគ្គតារម្មណំ, នវ លោកុត្តរធម្មេ បច្ចវេក្ខណកាលេ អប្បមាណារម្មណំ, បណ្ណត្តិំ បច្ចវេក្ខណកាលេ នវត្តព្ពារម្មណំ. មគ្គសច្ចំ សហជាតហេតុវសេន សព្ពទាបិ មគ្គហេតុកំ វីរិយំ វា វីមំសំ វា ជេដ្ឋកំ កត្វា មគ្គភាវនាកាលេ មគ្គាធិបតិ, ឆន្ទចិត្តេសុ អញ្ញតរាធិបតិកាលេ នវត្តព្ពំ នាម ហោតិ. ទុក្ខសច្ចំ អរិយានំ មគ្គបច្ចវេក្ខណកាលេ មគ្គារម្មណំ, តេសំយេវ មគ្គំ គរុំ កត្វា បច្ចវេក្ខណកាលេ មគ្គាធិបតិ, សេសធម្មបច្ចវេក្ខណកាលេ នវត្តព្ពំ ហោតិ.

ទ្វេ សច្ចានីតិ ទុក្ខសមុទយសច្ចានិ. ឯតានិ ហិ អតីតាទិភេទេ ធម្មេ អារព្ភ ឧប្បត្តិកាលេ អតីតាទិអារម្មណានិ ហោន្តិ. សមុទយសច្ចំ អជ្ឈត្តាទិភេទេ ធម្មេ អស្សាទេន្តស្ស អជ្ឈត្តាទិអារម្មណំ ហោតិ, ទុក្ខសច្ចំ អាកិញ្ចញ្ញាយតនកាលេ នវត្តព្ពារម្មណម្បីតិ វេទិតព្ពំ. ឥតិ ឥមស្មិំ បញ្ហាបុច្ឆកេ ទ្វេ សច្ចានិ លោកិយានិ ហោន្តិ, ទ្វេ លោកុត្តរានិ. យថា ច ឥមស្មិំ, ឯវំ បុរិមេសុបិ ទ្វីសុ. សម្មាសម្ពុទ្ធេន ហិ តីសុបិ សុត្តន្តភាជនីយាទីសុ លោកិយលោកុត្តរានេវ សច្ចានិ កថិតានិ. ឯវមយំ សច្ចវិភង្គោបិ តេបរិវដ្ដំ នីហរិត្វាវ ភាជេត្វា ទស្សិតោតិ.

សម្មោហវិនោទនីយា វិភង្គដ្ឋកថាយ

សច្ចវិភង្គវណ្ណនា និដ្ឋិតា.