៤. ធម្មទស្សនវារវណ្ណនា

១០០៧. ចតុត្ថវារេ ឯកាទសាយតនានីតិ សទ្ទាយតនវជ្ជានិ. តញ្ហិ ឯកន្តេន បដិសន្ធិយំ នុប្បជ្ជតិ. ឥមិនា នយេន សព្ពត្ថ អត្ថោ វេទិតព្ពោ. សត្តកេ ‘‘ទេវានំ អសុរាន’’ន្តិ គតិវសេន អវត្វា អវិសេសេន គព្ភសេយ្យកានន្តិ វុត្តំ. តស្មា យត្ថ យត្ថ គព្ភសេយ្យកា សម្ភវន្តិ តត្ថ តត្ថ តេសំ សត្តាយតនានិ វេទិតព្ពានិ. តថា ធាតុយោ. សេសមេត្ថ ឧត្តានត្ថមេវ. បញ្ចមវារេ យំ វត្តព្ពំ តំ ធម្មសង្គហដ្ឋកថាយំ វុត្តមេវ.