២. ឧប្បត្តានុប្បត្តិវារវណ្ណនា

៩៩១. ទុតិយវារេ យេ ធម្មា កាមភវេ កាមធាតុសម្ភូតានញ្ច សត្តានំ ឧប្បជ្ជន្តិ – កាមធាតុយំ បរិយាបន្នា វា អបរិយាបន្នា វា – តេ សព្ពេ សង្គហេត្វា កាមធាតុយា បញ្ចក្ខន្ធាតិអាទិ វុត្តំ. រូបធាតុអាទីសុបិ ឯសេវ នយោ. យស្មា បន រូបធាតុបរិយាបន្នានំ សត្តានំ ឃានាយតនាទីនំ អភាវេន គន្ធាយតនាទីនិ អាយតនាទិកិច្ចំ ន ករោន្តិ, តស្មា រូបធាតុយា ឆ អាយតនានិ, នវ ធាតុយោតិអាទិ វុត្តំ. យស្មា ច ឱកាសវសេន វា សត្តុប្បត្តិវសេន វា អបរិយាបន្នធាតុ នាម នត្ថិ, តស្មា អបរិយាបន្នធាតុយាតិ អវត្វា យំ យំ អបរិយាបន្នំ តំ តទេវ ទស្សេតុំ អបរិយាបន្នេ កតិ ខន្ធាតិអាទិ វុត្តំ.