(៧.) សត្តកនិទ្ទេសវណ្ណនា

៩៤៩. សត្តកនិទ្ទេសេ ថាមគតដ្ឋេន អប្បហីនដ្ឋេន ច អនុសេន្តីតិ អនុសយា. វដ្ដស្មិំ សត្តេ សំយោជេន្តិ ឃដេន្តីតិ សំយោជនានិ. សមុទាចារវសេន បរិយុដ្ឋហន្តីតិ បរិយុដ្ឋានានិ. កាមរាគោវ បរិយុដ្ឋានំ កាមរាគបរិយុដ្ឋានំ. សេសេសុបិ ឯសេវ នយោ.

៩៥០. អសតំ ធម្មា, លាមកដ្ឋេន វា អសន្តា ធម្មាតិ អសទ្ធម្មា. រាគាទីហិ ទោសេហិ ទុដ្ឋានិ ចរិតានីតិ ទុច្ចរិតានិ. តេន តេនាការេន មញ្ញន្តីតិ មានា.

៩៥១. ទិដ្ឋិនិទ្ទេសេ រូបីតិ រូបវា. ចាតុមហាភូតិកោតិ ចតុមហាភូតមយោ. មាតាបិតូនំ ឯតន្តិ មាតាបេត្តិកំ. កិន្តំ? សុក្កសោណិតំ. មាតាបេត្តិកេ សម្ភូតោ ជាតោតិ មាតាបេត្តិកសម្ភវោ. ឥធ រូបកាយសីសេន មនុស្សត្តភាវំ អត្តាតិ វទតិ. ទុតិយោ តំ បដិក្ខិបិត្វា ទិព្ពត្តភាវំ វទតិ. ទិព្ពោតិ ទេវលោកេ សម្ភូតោ. កាមាវចរោតិ ឆកាមាវចរទេវបរិយាបន្នោ. កពឡីការំ ភក្ខយតីតិ កពឡីការភក្ខោ. មនោមយោតិ ឈានមនេន និព្ពត្តោ. សព្ពង្គបច្ចង្គីតិ សព្ពង្គបច្ចង្គយុត្តោ. អហីនិន្ទ្រិយោតិ បរិបុណ្ណិន្ទ្រិយោ; យានិ ព្រហ្មលោកេ អត្ថិ តេសំ វសេន, ឥតរេសញ្ច សណ្ឋានវសេនេតំ វុត្តំ. អាកាសានញ្ចាយតនូបគោតិ អាកាសានញ្ចាយតនភាវំ ឧបគតោ. ឥតរេសុបិ ឯសេវ នយោ. សេសំ សព្ពត្ថ ឧត្តានត្ថមេវាតិ.

សត្តកនិទ្ទេសវណ្ណនា.