៤. សង្គណិការាមសុត្តវណ្ណនា

៦៨. ចតុត្ថេ សង្គណិការាមោតិ គណសង្គណិការាមោ. សុត្តន្តិកគណាទីសុ បន គណេសុ អត្តនោ វា បរិសាសង្ខាតេ គណេ រមតីតិ គណារាមោ. បវិវេកេតិ កាយវិវេកេ. ចិត្តស្ស និមិត្តន្តិ សមាធិវិបស្សនាចិត្តស្ស និមិត្តំ សមាធិវិបស្សនាការំ. សម្មាទិដ្ឋិន្តិ វិបស្សនាសម្មាទិដ្ឋិំ. សមាធិន្តិ មគ្គសមាធិញ្ចេវ ផលសមាធិញ្ច. សំយោជនានីតិ ទស សំយោជនានិ. និព្ពានន្តិ អបច្ចយបរិនិព្ពានំ.